Read Bawm Chin JOB 17 Bible Online

JOB 17 - Bawm Chin bible

JOB 17

¹Ka thih ni a nâi rawh. Zângrah hen ka thaw ka suah. Ka rangah thlân cho lo chu zeikhawm siah a um lo.

²Mikip nih an hawng ka tluktlak mi ko rawh.

³Zumhkâi tak hen ka um le, Pathian ka thu pawm. Ka thusim lakah hawng ka ṭangpitu ding âukhawm an um lo.

⁴Dawnnâk ding mi thinlung chu na khâr piak na, tuah annih tla chu keimah nehtu ah siam lah na.

⁵Thufing ah tangka ruangah mi nih a hâwi tla rangah a tleihtir na, churuangah a fa tla nih an tuar.

⁶Chu thufing chu ka lakah mi nih an mang le, an hawng le, ka mêl ah chil an ka sah.

⁷Ka ngaihsiatnâk nih ka mit a châwtir awt rawh. Ka bân leh ka kê tla chu thlaliah hâwi hen a râwm.

⁸Mi zumhkâi anna ti mi tla nih an ka lauh le, Pathian neilo mi hâwi hen an ka mawhtir hep.

⁹Mi zahkâi hen anna ruat mi tla chu, an dik hen anna ruat dadauh.

¹⁰Sikhawmsele ka mâika ah an ektê hen an hawng dîr khawmsele, a fing mi pakhat khawm ka muh na lai loh.

¹¹Ka san khawm a dih vima, ka thiltum khawm a dik kho lo rawh; ka lungumnâk khawm a tlâu rawh.

¹²Sikhawmsele ka hâwi tla nih zân chu sûn nî chêu asi an ti le; chêu a nâi rawh an ti, sikhawmsele mûi lakah ka um ti ka theih.

¹³Laikulh thihnâk cho ka lungum, chu mûi lakah chun it ding hen ka zâu lai rawh;

¹⁴Thlân leh hawng ka eitu tholung chu ka pa ka ti na lai le, nu leh farnu ka ti na lai.

¹⁵Ka rangah lungumnâk zeiah a um? Âu nih me a muh?

¹⁶Lungumnâk chu laikulh thihnâk ah ka kal tikah ka sinah a hawng awt lo.