Read Bawm Chin JOB 2 Bible Online

JOB 2 - Bawm Chin bible

JOB 2

¹Vân minung tla LALPA mâika ah an va langh ni a hawng tlung nawlh le, Setan khawm a va tel bâk.

²LALPA nih Setan sinah “A zeiah na um?” a ti. Setan nih a sâng le, “Hi bangah leh khi bangah ka kal le, tual ka ṭawl,” a ti.

³LALPA nih Setan sinah, “Ka to-aw Job khi na muh ma?” “Amah hâwi hen mi ṭha leh zumhkâi tual tlûnah âukhawm an um lo, keimah hawng ka sawnh le, thilsual ti leikângah â thiamthih thlo. A san umlo thlo hen amah nganfâk na pêk ding hen hawng ka deih khawmsele, Job zumh a kâinâk chu a mahmun nget asi,” a ti.

⁴Setan nih a sâng le, “Mi nih a nungnâk hum ding duh ruangah a thil a ap hep kho.

⁵Sikhawmsele, tuah a taksa lakah nganfâk pêk nik, na mâika ah a nan simsiat lai! “a ti.

⁶Churawhchun, LALPA nih Setan sinah, “Asi ma chu, na duhzia zawng hen ti le, sikhawmsele thah lam chu thah lah,” a ti.

⁷Churawhchun Setan chu LALPA thawk hen a kal rawh, Job chu a tak pum hen mâ a khattir phak.

⁸Nâwmpawng kiangah a to le, bêl kuai hen a mâ a huat.

⁹A nupi nih a sinah, “Na thinlung dang putlo hen zumhkâi hen ma na um awt nget rih? Pathian simsiat le, thi ko,” a ti.

¹⁰Job nih a sâng le, “Nang hi zeikhawm theihlo pet hen thu na sim,” a ti. Pathian nih zei thil ṭha mawh hawng kan pêk chun kan a lâwm, thil sia a hawng tlung liauah kan simsiat kho lai mazei? Hi bang zawng tuar khawmsele Job nih Pathian a simsiat lo thlo.

¹¹Job hâwi pathum, Eliphaz chu Teman khuapi mi asi le, Bildad chu Suah ram ah mi asi, Zophar chu Naamah ram ah mi asi. Job thil tuar fâk zia an theih le, amah thlangamh ding hen kal an tum.

¹²An kal liauah râllâtpi ah Job chu an muh le, amah tak asi ti an theihfiang lo. An muh fiang rawh chun an ṭap le, an lung a fâk tukah an nipuan tla an thlêk le, vân leiah valeidip an lawh le, an lû tlûnah an phulh.

¹³A tuar fâk dân an muh le, ni sarih leh zân sarih zei thu khawm simlo hen an to.