Read Bawm Chin JOB 21 Bible Online

JOB 21 - Bawm Chin bible

JOB 21

¹Zeizawng ngâk hen, ka thusim hi ngâi le, ka nan duh.

³Hawlh ding hen hawng ka kianh ta rih le, ka sim thluh chun na duh chun hawng ka nihsanh.

⁴Minung a thi kho mi hen ka êl mi asi lo; dawnh ding hen a san ṭhatak ka nei.

⁵Hawng ka zauh. Thinlung purh khit hen dâi dep ka nan siam ding mi chu a tâwk lo ma?

⁶Ka lakah thil a hawng tlung mi tla ka dawn chun, ka â thlo le, ka thir hen ka nîn.

⁷Zeirangah Pathian nih misual tla a zuah hen, tar tiang a zuah na hen, an sul-le-lam a tluangtir na êu?

⁸Tu leh fa tla nei hen an ṭhangzawh tiang, anmah vêngtu dingah a damtir na.

⁹Pathian nih an insungkhur lakah khawm siat leh râwknâk a tlungtir lo; ningṭihnâk zeikhawm an theih loh.

¹⁰Asi, an ran tla khawm an pung le, siat leh râwk lo hen fa an ring.

¹¹An fa tla chu dawrâ fa hâwi hen an pung le,

¹²tumphung ṭingṭang leh theikhang tum hen an lâm.

¹³Thlangam tak hen an um le, ngandam tak hen an thi.

¹⁴Misual tla nih Pathian rangah anmah lâwng mâk thlap ding hen an simh le, an nungnâk ding hen a duhzia theih ding an duh loh.

¹⁵Pathian nâwlzulh ding herh hen an theih lo le, a sinah thlachamnâk khawm a ṭhatnâk an theih loh.

¹⁶Mah chaknâk hen dingchang mi hen anna ruat le, an thinlung ah ruatnâk nih chun kei ka duhzia asi lo an ti.

¹⁷Misual chêunâk hi a veih dah tâwn ma? Pakhat tal nih siatnâk an tawng dah tâwn mazei?

¹⁸Pathian nih a thinthawknâk hen misual chu fabû thli nih a ranh ving hâwi leh ruah nih valeidip a fenh mi hâwi hen a rêp dah tâwn ma?

¹⁹A pa sual ruangah a fa Pathian nih a rep na ti. Silo! Pathian nih a sualtu tla tak a rêp le, anmah sual ruangah asi ti a theihtir na.

²⁰Misual nih chun anmah sual ruangah rêpnâk tuar na sele; Pathian zeizawng tikho thinthawknâk tuar na seh.

²¹Mi a thi ving nûnah, a fa tla zei hâwi an um ti hen a theihpi kho na mazei?

²²Vân sâng takah lâirêltu Pathian rangah mi nih a sîntir kho mazei?

²³Mi zeimaw mi chu an thih tiang hen, ṭhisel tak hen an um le, nuam tâk leh awldek hen an thi le, an taksa tla khawm duh duh ei hen an um.

²⁵A zeimaw mi chu tâwm khawm lâwmnâk an nei lo thlo. Thinlung fâk bû hen an thi.

²⁶Sikhawmsele, bang khap hen thi hen vûi an si, tholung hen tuam pang hen an um.

²⁷Zauhnawmhnâk thinlung na nei ti ka theih.

²⁸“Thilsual titu mi rokual in, tuah zeiah a um?” na ti. thilsual tilotu tla an nih a suak.

²⁹Khualtlâwng mi tla hen nanna sâwn lo ma? An thu an hawng sim mi na theih lo ma?

³⁰Ni khat chu Pathian a thinthawk le, a rêp na, misual chu zuah asi kumza tâwn.

³¹Misual phiartu âukhawm a um lo, a thilti lehrûl samtu khawm a um lo.

³²Thlân leiah kalpi asi liauah, thlân sungah him tak hen a um le,

³³sâng tamtak nih a ruak vûinâk ah an zûl le, tual khawm nih a taksa chu dîn dik hen a vurh.

³⁴Nang rîlmâl nih theihnâk neilo pet hen lungiam sak ding na ka awt! Na ka sâng mi zawzawng âwkrâwl hep asi!