Read Bawm Chin JOB 22 Bible Online

JOB 22 - Bawm Chin bible

JOB 22

¹Pathian leikângah mang tâwn mi, minung a fing chem mi a um rerêng ma?

³Na diknâk nih Pathian rangah ṭhavaknâk a tuah hen, amah rangah zeizawng ah na ṭangpi ma?

⁴Pathian nih nunsimhnâk leh niknâk, na lakah a tlungtir mi hi amah na ṭih ruangah asi lo.

⁵Silo e, tamtak na sual ruangah leh, thilsual zawzawng na ti ruangah asi.

⁶Na unau nih na sinah tangka â bat mi rulh nawlh ding mi ruangah a nipuan tla na lâk piak le, ruk leh aih ding zeikhawm na siah piak lo.

⁷Mi dî rangah tî na siang lo le, mi sungvâng tla rangah buh pêk ding na duh lo.

⁸Ram pumpi lâk hep ding hen na thiltikhonâk leh na dîrmun na mang.

⁹Numei tla ṭangpi na ding na duh lo mi lâwng asi lo le, mi ngâkṭah tla rangah na rawk na le, na nehsawh na.

¹⁰Churuangah tuah na kiangkam chu tlâknâk khur hep asi. Nang rangah ṭihnung a kâi thlo rawh.

¹¹Na muh kho lo hen thungâi a mûi rawh. Tîlian nih a nan vurh dep.

¹²Vân sâng ah Pathian a um hen, ârfi thlâpa sâng tak ah a um mi tlûnlei thawk hen a suk hen a hawng bih lo ma?

¹³Sikhawmsele, nang lam nih chun, “Pathian nih zei me a theih lai le, sûm lakah â thup ving mi, “Zeitin lâi hawng kan rêl kho lai?” na ti.

¹⁴Tual leh vân â rînâk ah a kal mi, vândâwm nih an muh kho lo ding hen phenh pang ding hen na ruat.

¹⁵Misual tla kalnâk lampi ah kal ding hen na tum ma?

¹⁶Annih chu an tik a tlung lânah tîlian nih a fenh ving na.

¹⁷Chubang minung tla chu asi, Pathian duhlotu, an rangah zeitin khawm ti kho lo ding hen ruattu tla chu.

¹⁸Sikhawmsele, anmah tla sul-le-lam tluangtirtu chu Pathian asi le, misual le tla thinlung ruat lam chu ka theih kho lo.

¹⁹Misual rêp mi an muh liauah mi ṭha chu anna lâwm le,

²⁰Misual neih zawzawng chu a vei le, a leifuan khawm mei nih a khangh hep.

²¹Job, tuah, Pathian hen a rem u. Mêlma hâwi hen a rangah na ti mi hi bâng le, chu hâwi na ti chun mal a nan sâwm lai.

²²A nan sîntirnâk chu pawm le, na thinlung ah a thu chu kil rawh.

²³Asi, Pathian sinah thinlung nâu tak hen na kîr ding asi. Na insungkhur ah thilsual na ti mi zawzawng mâk hep.

²⁴Na ngûn tla lawnh phin le, tî kangva tidil ah na ngûn a ṭha chem mi lawnh.

²⁵Pathian zeizawng tikho chu na ngûn leh na tangka si sele, na rangah sâng tak hen pawng rawh.

²⁶Churawhchun Pathian zumhnâk na nei lai le, amah chu lâwmnâk bul asi ti na theih lai.

²⁷Thla na cham tikah anih nih a nan sâng lai. A sinah na thutiam chu na zulhpeh lai rawh.

²⁸Thil na ti mi zawng na dingchang lai le, na lampi chu chêu nih a cherh lai.

²⁹Pathian nih mi â zûm mi chu a niamh le, thinlung nâu mi tla chu ruang a suah na.

³⁰Thilsual na tilo hen thil dik na ti chun, amah nih a nan hum lai.