Read Bawm Chin JOB 24 Bible Online

JOB 24 - Bawm Chin bible

JOB 24

¹Amah rianṭuantu tla rangah lâirêlnâk ni rangah zeirangah Pathian nih tik a ruat lo.

²Mi nih ram kâu dauh tawng ding duh ruangah anna rînâk kâu dauh a ṭhial le, dawrâ ranrual tla an fîr le, anmah ranrual lakah an fawnh.

³Mi ngâkṭah sanatung tla an lâk piak na le, numei nih chawchal chu â bat mi a lîm lân lo an tleih piak.

⁴Mipâm tla chu thuneihnâk zeikhawm an neitir lo le, ṭangpi herh mi tla chu tek hen an thuptir na.

⁵Churuangah mipâm tla chu mâng sanatung hâwi hen, ramkaro a châr mi lakah ei ding an hâwl! Zeikhawm ah an fa tla rangah ei ding an tawng lo.

⁶Anmah tâ silo mi phâisen ah fângât ding an nei. Misual tla grep dûm ah mi an kawih.

⁷Zân ah puan aihlo hen an it le, daih lakah lumtirtu zeikhawm a um lo.

⁸Tlâng ah ruahsûr mi nih a surh na le, lungpi sîrah anna dawr.

⁹Misual tla nih ngâkṭah pa neilo tla chu sal ah an mang na le, mipâm fa tla chu an leibâ sam ding rûlah an lâk na.

¹⁰Sikhawmsele, chu mipâm tla chu nipuan lo hen suak ding mi an si. Fângât liauah sungvâng bû hen kal ding mi an si.

¹¹Oliv sariak an sûr le, uain rangah grep rah an sûr. Sikhawmsele anmah chu tîhâl hen an um.

¹²Khuapi ah thi viviar hen liam hen a ṭap le, sikhawmsele Pathian nih an thlachamnâk chu ngaihlo lem a thlâk piak na.

¹³Chêu duhlo mi minung an um le, an theihthiam lo, a rui na nâk ding khawmah an kal lo.

¹⁴Khuadei bâiah mi thahtu chu a thawk le, mipâm thah ding hen a suak le, zân ah chun mi thil a fîr.

¹⁵Ṭângdang pawmtu nih mûi supsap a ngâk le, âukhawm muhlo ding hen a mêl a khuh pang.

¹⁶Zân ah mifîr tla chu in sungah an lût le, sikhawmsele, sûn ah anna thup le, chêu an sâi thiam lo.

¹⁷Sûn nî chêu chu an ṭih le, sikhawmsele, zân ah chun ṭihnâk rêng an nei lo. [Zophar][1]

¹⁸Misual chu tîlian nih a fenh ving le, a ram neih chu Pathian siatbarh asi le; a grep dûm ah rianṭuan ding hen a kal lo rawh.

¹⁹Vûr nih linhnâk leh nikhua khêu a tlâutir hâwi hen, misual tla nih ram lakah um kholonâk an siam.

²⁰A nu nih tuah theihlo kumza rih khawmsele, tholung nih a ei le, thing a tlû mi hâwi hen a vei.

²¹Chu hâwi thil a hawng um mi chu, numei tla a nehsawh ruangah leh fa neilo nunau tla tlûnah vêl a nei lo ruangah.

²²Pathian nih a chaknâk hen mi chak a veih; Pathian thilti lakah misual an thi.

²³Pathian nih him tak hen amah chu a vêng kho, zeiliau zawngah a tlûnah a mit a rak kumza.

²⁴Misual chu sâwtlotê sul-le-lam tluang hen a um le, sikhawmsele belh hâwi hen a uai le, favûi ât rawh mi hâwi asi.

²⁵Chu hâwi asi mi lakah, silo ti khotu âu a um? Ka thu hi a dik lo ti âu nih sim kho?