Read Bawm Chin JOB 29 Bible Online

JOB 29 - Bawm Chin bible

JOB 29

¹Job nih thusim â dawmh nawlh. Job nih

²Pathian nih hawng ka zauhkhenh mi hâwi hen zauhkhenh hen um nawlh sele ka duh a.

³Pathian chu ka sinah a um kumza le, mûi lakah ka kal liau khawmah chêu hawng ka pêk.

⁴Chubang sul-le-lam tluang hen ka um liau chun, Pathian hen kawmhnâk nih ka in chu vêng hen a um.

⁵Zeizawng tikho Pathian chu ka sinah a um le, ka fa tla nih kulh bung hen ka um.

⁶Ka chaw leh kêl tla nih an nûk hâng tamtak an suah le, lung nâwngah ka oliv thing tla an ṭhang.

⁷Khuapi upa hen kanna tawng zâwn ah, an sinah ka to bâk le,

⁸tlangvâl tla nih an ka muh kâ hen, anna kiang le, upa tla chu hawng ka zah ti theihnâk ding hen an dîr.

⁹Zapi ruitu tla chu an thusim an bâng le;

¹⁰mi pawimawh dauh tla khawm an dâisip.

¹¹Hawng ka muhtu leh ka thâwng theihtu tla nih ka thilti thâwngthâng tla chu ṭha hen an sim.

¹²Mipâm an âu mi tla chu ka ṭangpi na le, mi ngâkṭah tla chu sirem ding hen ka ṭangpi.

¹³Mi lawksawng chem tla khawm nih an ka sawr le, numei tla chu him tak hen ka ṭangpi na.

¹⁴Dik tak leh rep tak hen thil ka ti kumza.

¹⁵Mitchâw rangah mit ka si le, kekhêng rangah kê ka si.

¹⁶Mipâm tla rangah chun pa hâwi ka si le, khual lawksawng tla ka bawmh na.

¹⁷Mi suaksual tla thiltikhonâk ka veih le, an kut ah tuartu tla chu ruang ka suah na.

¹⁸Sâwt tak dam ding leh thlangam tak hen in ah thi ding ka ruat kumza.

¹⁹Tî nâwngnâk ah ram a thlâk mi thing amah damtî nih a chinh mi hâwi ka si.

²⁰Mikip nih an ka sawr le, ka tha khawm â zûk lo.

²¹Mi tla krai ka pêk na chun dâisiptê hen ṭha tak hen ka thusim an ngâi le;

²²ka thusim ka lîm rawh chun, zeikhawm sap ding hen thusim ding an nei lo.

²³Ruah mal a tlâ mi hâwi hen, ka thu chu a mantalâ le, phâisen tuahtu tla nih ruahtîr an lawmh mi hâwi hen, mikip nih ka thusim an lawmh.

²⁴An thinlung dawng zâwn chun ka nihsanh na tâwn le, ka mêl ah lawmhnâk nih lungiam a sak na.

²⁵Keimah hotu ah ka siam le, thu ka thlûk. Lal nih a kawrsen tla a rui na mi hâwi hen ka rui na le, an ning dawngnâk ah thla ka ngamh na.