Read Bawm Chin JOB 30 Bible Online

JOB 30 - Bawm Chin bible

JOB 30

¹Tu lam chu keimah ngâk hen ngâksia tla nih an ka dehchawh rawh. An pa tla chu ka dawrâ vêngtu leh ka ui ruitu rang khawmah an tlâk lo mi tla an si.

²Mi chaklo tla, ka rangah rianṭuan ding hen tlâklo tuktarâi mi tla an si.

³An pâm hen an sungvâng tuktarâi le, ramkaro mi thing ram châr an khelh--zân ah, mâng ah, mun karo tla ah.

⁴Ramkaro mi belh an phâwi le, an ei le, munphiah ram thâwtnâk neilo mi khawm an ei.

⁵Mifîr tla an auh na mi hâwi hen tlâu phin an auh nawh na.

⁶Pûk leh tlâng sîrah lungkhur chawh mi lakah an um.

⁷Ramsa hâwi hen mâng ah anna sawk le, bua nâwngah anna pûm le, an râk chur.

⁸Zei kawngkâ zawh lo leh mi salam murui! Ram lakah thawk hen nar mi tla an si.

⁹Tu chun an hawng le, an ka nihsanh. Annih rang chun zeikhawm silo, an nihsanh tâwk cho ka si.

¹⁰An hawng ka fih le, annih chu kei ngâk hen ṭha tuktarâi ah anna ruat le, an hawng le, ka mêl ah chil an ka sah.

¹¹Pathian nih chaklo leh ṭangpi herh hen hawng ka siam ruangah, an thinrunhnâk zawzawng hen an ka do.

¹²Hi minung tla nih an ka do le, an hawng ka tektir le, ka rangah siat leh rawknâk dawnghnâk an timhtuah.

¹³Ruang ka suaknâk ding an kham le, veih ding an ka awt, âukhawm nih an kham na lo.

¹⁴Ka thupnâk kua lakah an ka lût nawh le, ka thupnâk tlûnlei ah an ka khâwk nawh.

¹⁵Lâunâk nih hawng ka neh rawh, ka thinlung chu thli nih a ranh ving mi hâwi asi. Ka vânṭthatnâk sûm hâwi hen a vei.

¹⁶Tu lam chun ka thi awt rawh. Ka nganfâk rehnâk ding rêng a um lo.

¹⁷Zân ah ka ruh zawzawng a fâk le, nganfâknâk nih hawng ka fêp mi khawm a dam kho lo.

¹⁸Pathian nih ka kawrdawh ngâwng ah hawng ka tleih le, ka puan tla a rual dip.

¹⁹Nêngthû lakah hawng ka lawnh le, nâwmtâm tluk cho ka si rawh.

²⁰Pathian, ka nan auh le, sikhawmsele na ka sâng lêm lo. Thla ka cham khawmah na ka ngâi piak lo.

²¹Ṭhalo tak hen na hawng ka ti le; na thiltikhonâk zawzawng hen na ka nehsawh.

²²Thli na ranhtir ving le; thli chawp tak hen na ka sêm.

²³Ka thihnâk ding leikângah, mikip a thi mi tawngpumhnâk ah na ka put ti ka theih.

²⁴Zeirangah siat leh râwk hen um mi, zeikhawm tikho lo hen, zângfahnâk ngiartu rangah na do?

²⁵Lawksawng hen um mi tla sinah ka ṭap hen, ṭangpi herh tla rangah ka lung kham lo ma?

²⁶Lâwmnâk leh chêu ka lungum le, chubang ding ngâk hen nawknâk leh mûi a hawng tlung.

²⁷Dîtnâk leh nganfâk nih a ka thlêk dip; a ni ni hen ka tuar mi a zual dadauh.

²⁸Ngaihsiatnâk mûi, nî chêu umlonâk ah ka kal le; zatlâng lakah ka dîr le, ṭangpi ka ngiar.

²⁹Ka hâu chu kâwlui leh vachâ hâu hâwi hen a king hen ngaihsiatnâk hâu hâwi asi.

³⁰Ka vun chu a dum ver le, damlonâk nih hawng ka ṭêm pang.

³¹Tuah lungfâknâk leh ṭapnâk lâwng ka theih mi hi, lâwmnâk rihâu zei tikah ka theih nawlh lai aw!