Read Bawm Chin JOB 31 Bible Online

JOB 31 - Bawm Chin bible

JOB 31

¹Thinlung ah duhnâk nei hen nungâk zauh lo ding hen thutiamnâk bir tak ka siam.

²Pathian zeizawng tikho nih zeitin hawng kan ti? Minung thilti lakah zei hâwi hen lehrûl a sam?

³Thilsual titu tla rangah siatnâk leh râwknâk a tlungtir.

⁴Ka thilti zawzawng Pathian nih a theih le, ka kekâr tla a muh hep.

⁵Sual tak hen thilti lo ding leh midang tla perpet lo ding hen thu ka tiam.

⁶Pathian nih zumhkâinâk hen hawng ka khingh sele, thilsual ka tilo zia a muh lai.

⁷Lampi dik lakah mi ka pial hen, sual leikângah kuih hen ka um hen, ka kut nih thilsual a ti chun,

⁸ka thlâi ching tla vei sele, ka fâng chîng khawm midang nih ei na seh.

⁹Ka in pah nupi lakah ka thinlung a um hen, a thup hen lenglei ka bawh chun,

¹⁰ka nupi chu midang mipa eibâr siamtu si hen, midang mipa ihkhun ah it seh.

¹¹Chubang hâwi sualnâk titu chu thihnâk hen rêp ding asi.

¹²Siat leh râwknâk rêpmun mei nih ka neih zawzawng veih hep seh.

¹³Ka to-aw lakah mi pakhat nih lungsilonâk a neihkhawmah, ṭhadektê hen ka ti lai le; a thu ka ngâi piak lai.

¹⁴Chu hâwi ka ti lo chun, zeitin Pathian lei ka hawi kho lai? Pathian nih ka lakah lâi a rêl tikah zei thu ka sim kho lai?

¹⁵Keimah siamtu Pathian ber nih, ka to-aw khawm a siam mi asi.

¹⁶Mipâm rangah ṭangpi ding hen ka êl dah loh. Numei tla khawm thinlung dawng hen ka umtir na dah lo.

¹⁷Mi ngâkṭah tla khawm buh ka ei liauah sungvâng tak hen ka siah dah na lo.

¹⁸Ka damliau ni tla chu anmah zauhkhenhnâk ah ka mang.

¹⁹Mi âumawh mipâm, ni leh puan châwk kho lo hen, pâm tuktarâi ka muh chun,

²⁰Keimah ranrual lakah mi dawrâ mul, puan ah siam mi ka pêk lai. Chu tikah anih nih a thinlung zawzawng hen hawng ka sawr lai.

²¹Mi ngâkṭah rangah, lâirêlnâk ah thu hen neh kho asi ti ka theih ruangah ka perpet chun,

²²ka bân tla kiak sele, ka liang thawk hen bauh zek na seh.

²³Pathian rêpnâk ka ṭih ruangah chu hâwi thil chu ka ti dah lo.

²⁴Neih leh siah ka rinhsanh lo le,

²⁵ka neih khawm ka zûm phah lo.

²⁶nî leh a chêunâk mawh, thlâ leh a dawhnâk khawm ka sawnh dah lo.

²⁷Anmah zah leh châwchawk hen, ṭih ruangah mahlo leikângah, ka pial dah lo.

²⁸Pathian zeizawng duhlotu asi ruangah, chu hâwi sual chu thihnâk hen rêp ding asi.

²⁹Ka mêlma tla nih vânduai an tawng liau khawmah ka lâwm dah lo le, anna râwk anna siat liau khawmah ka lâwm lo.

³⁰Anmah thi ding hen sual tak hen thla ka cham dah lo.

³¹Ka rangah rianṭuantu zawzawng nih khual tla rangah ka sunhsak na mi an theihkumza.

³²Khualtlâwng mi minung tla tualmâi ah ittir na lo hen, ka in ah ka kawh na.

³³Midang tla nih an sual pheh an tum le, kei lam, chu pheh ka tum dah lo.

³⁴Minung thusim lakah ka lâu dah lo; an hawng ka siarlo ding mi ṭih ruangah, in sungah erh ziar hen ka dâisip dah lo.

³⁵Ka thusim hi pakhat tal a ngâitu a um lai maw aw? Ka thusim zawzawng hi a dik asi ka ti ngam asi. Zeizawng tikho Pathian nih hawng ka sâng seh. Ka mêlma nih ka lakah thu pawi a nei chun, ka muh ding hen rîn hen um sele,

³⁶ka liang tlûnah zumh bû hen ka put lai le, lallukhuh hâwi hen ka lû ah ka khuh lai.

³⁷Pathian sinah ka thilti zawzawng ka simh lai le, a mâika ah ka lû sâng tak hen ka siah lai.

³⁸Ka tuah mi ram chu, a dâwngpu tak sinah mi ka fîr hen,

³⁹chunah chîng mi fâng chu ka ei hen, a lo dâwngpu khawm ei ding neilo hen a um chun,

⁴⁰chu lakah chun fâng ruangrûl ah, bua leh bualingnei kho seh. Job thu chu a dawng rawh.