Read Bawm Chin JOB 32 Bible Online

JOB 32 - Bawm Chin bible

JOB 32

¹Job chu a sual lonâk a theih ruangah mi pathum nih a thu sâng ding an awt lo rawh.

²Job nih amah thang â ṭhattir le, Pathian a sâwi ruangah an kiangah dîr mi Elihu chu a thinthawk a diarh lo rawh. (Elihu chu Buz thlâk, Barakel fapa, Ram chi asi.)

³Job hâwi pathum tlûnah khawm a thin a run. Job rangah sâng ding dân khawm an theih lo rawh le, Pathian lam diklo hen an kaltir.

⁴An lakah Elihu chu a ngâksia chem mi asi ruangah an thusim lîm a ngâk ko.

⁵Minung pathum nih Job rangah an sâng kho lo ti a muh le,

⁶thusim a dawmh rawh. Elihu nih Kei chu ngâksiatê ka si le, nannih lam chu upa nan si le, churuang chun ka thinlung ah ka ngaihdân an simh na ding khawm kan zah na.

⁷Nannih upa dauh nan si ruangah, nan finghnâk hen thusimtu dingah kan kawh na asi.

⁸Sikhawmsele, minung sinah hawng hen finghnâk pêktu chu Pathian zeizawng tikhotu thlarau asi.

⁹Mi a upatnâk nih finghnâk a pêk hen, thil dik theih ding hen a ṭangpi lêm lo.

¹⁰Churuang chun tuah ka thu ngâi ule, ka ngaihdân ka nan simh na lai.

¹¹Tâimâk suah hen finghnâk hâwl hen thu nan sim liau ka nan ngâi ko na asi.

¹²Nâi tek hen kan ngâi ko na le, nan dik lo; Job thusim rerêng nan sâwi kho lo,

¹³Zeitin finghnâk ka tawng nan ti kho zia? Nan diklo ruangah Pathian nih Job chu a sâng lai.

¹⁴Job nih ka sinah silo hen, nan sinah thu a sim le, sikhawmsele, nannih nih nan sâng mi hâwi hen kei nih ka sâng ding mi asi lo.

¹⁵Job, annih tla chu an palh mi rawh, nang rangah an sâng kho lêm lo.

¹⁶Dâisip hen an um mi, kei rangah ngâk châwk ding mazei? Thu dang zeikhawm simlo hen an dîr ko rawh.

¹⁷Ka ngâk châwk na lo rawh. Keimah nih tuah ka nan sâng lai le, ka ngaihdân ka nan simh awt.

¹⁸Hawlh lo ding ka tum chiam le, ka tuarh kho lo rawh.

¹⁹Hawlh ding tik ka tawng lo chun, uain thar dûr a kek phet mi hâwi ka si awt.

²⁰Ka dîr ziar kho lo, thu ka sim awt.

²¹Hi thu êlnâk lakah âu lei khawm ka ṭângṭawm awt lo; âukhawm ka sawr awt lo.

²²Sawr ding khawm ka theih lo le, chu hâwi ka ti chun, Pathian nih hawng ka rêp sawm lebang lai.