Read Bawm Chin JOB 33 Bible Online

JOB 33 - Bawm Chin bible

JOB 33

¹Job, tuah thu ka sim ding mi zawzawng hi thiamthih tak hen ngâi.

²Ka thinlung ah mi thu sim ding hen ka râlring asi.

³Ka thu tla chu zumh a kâi hen, thu dik ka sim asi.

⁴Pathian thlarau nih hawng ka siam hen, nungnâk hawng ka pêk.

⁵Na ka sâng kho chun hawng ka sâng, êl ding hen a timhtuah.

⁶Nang leh kei chu Pathian mitmuh ah kanna bang cho le, kan panih hen nêng hen siam mi kan si.

⁷Churuangah kei rangah na ka ṭih ding a um lo; nang rangah an neh ding hen ka chak lêm lo.

⁸Tuah na thusim ka theih mi chu hi hi asi:

⁹“Kei ka sual lo; zeikhawm thil diklo ka ti lo. Kei chu sual lakah kawpkaihnâk ka nei lo.

¹⁰Sikhawmsele, Pathian nih hawng ka rêp mi lakah hin mawh lo hen a ruat le, mêlma hâwi hen ka tlûnah hawng ka ti.

¹¹Ka kê ah chikchîn hen hawng ka khih le, châng lo ding hen hawng ka ngâk rêt,” na ti.

¹²Sikhawmsele, Job, na diklo asi, ti ka nan simh. Mi zawzawng ngâk hen Pathian chu a lian dauh.

¹³Minung fa chipchiarnâk sâng dahlotu Pathian rangah zeirangah na mawhtir?

¹⁴Pathian nih thu sim lemang khawmsele, pakhat khawm nih an ngâi piak duh lo.

¹⁵Zân ah mi tla an it liau khawmah, manglei leh langhnâk hen Pathian nih thu a sim.

¹⁶A thusim chu a ngâitir na le, a simkannâk lakah an lâu.

¹⁷Pathian nih a zûm lo ding leh sual lo rawh ding hen an sinah thu a sim.

¹⁸Veih ding hen a siang na lo le, thihnâk lakah khawm a hum na.

¹⁹Pathian nih minung chu damlonâk leh nganfâk hen a nik na.

²⁰Mi damlo chu a buh kâ thâwtnâk a tlâu le, buh thâw chem khawm a zauh chun, a dang a tawk.

²¹A taksa chu â zûk ver le, a ruh karo hen na muh lai le;

²²Thihnâk laikulh ah a kal ding mi asi rawh.

²³Minung zauhkhenhtu Pathian vânmifial sâng tamtak lakah mi pakhat, amah ṭangpi hen a hawng kâi dahmawh.

²⁴Vânmifial nih khuaruat hen, “Suah u! Laikulh thihnâk ah kal ding mi asi lo. Suah ding hen hinah a man pêk asi rawh,” a ti lai.

²⁵A taksa chu a hawng no lai le, a chak nawlh lai le,

²⁶thla a cham tikah, Pathian nih a sâng lai le, Pathian chu lâwm bû hen a sawnh lai le, Pathian nih a rangah thil zeizawng dik tak hen a ruat piak nawlh lai.

²⁷Zatlâng sinah, “Ka sual ngâk, ka diklo, sikhawmsele, Pathian nih hawng ka zuah.

²⁸Thihnâk laikulh ah kal ding mi chu, hawng ka hum le, ka dam ko rih,” a ti lai.

²⁹Pathian nih thil zawzawng a ti vima le;

³⁰Minung nungnâk a zuah le, lâwm tak hen nung le damnâk a pêk.

³¹Job, tuah, ka thusim hi ngâi, thusim ding hawng ka kianh le, dâisip rih.

³²Sikhawmsele thusim ding na nei asi chun, ka ngâi lai le, lâwm tak hen na dik ka nan ti lai.

³³Chu hâwi asi lo chun, dâisip le, hawng ka ngâi ziar, zei hâwi hen fing ding asi, ka nan sîntir lai.