Read Bawm Chin JOB 37 Bible Online

JOB 37 - Bawm Chin bible

JOB 37

¹Thlipi nih ka thinlung a lâutir.

²Nan ektê hen LALPA hâu khuarît hâwi mi a kê thawk suak mi chu ngâi u.

³Chung vân ah mîmthlâ, khatlei kâwlkil tiang a lektir.

⁴A hâu a suah mi chu khuarît hâu lakah lal rokual hâu hâwi hen theih asi le, a rî liau chun mîmthlâ a lek.

⁵Pathian thupêk hen thilchê tla a hawng um le, thilchê kan theihthiam lo mi tla khawm.

⁶Tual ah vûr tla a tlâktir le, thli leh ruahpi a hawng fial.

⁷Minung tla rianṭuan a dîntir le, rianṭuannâk lakah â tel ti a theihtir na.

⁸Ramsa tla chu an pûk ah an kal.

⁹Thlipi chu simlei thawk hen a hawng le, daih chu marlei thawk hen a hawng tlung.

¹⁰Pathian thaw nih tî a khotir. Vûr tlang chang takah a changtir.

¹¹Pathian duhkâng hen mîmthlâ chu vândâwm a kal mi lakah a lek.

¹²Laikulh mun kipah, Pathian thupêk zia hâwi hen an um ver.

¹³Tual chinhtu ding Pathian nih ruah a sûrtir le, minung fa rêp ding hen mawh, a sunhsak ti theihnâk ding khawm a sûrtir kho.

¹⁴Job, sâwtlotê ngâi rih; Pathian nih thilchê a ti mi tla ruat nik.

¹⁵Pathian nih mîmthlâ vândâwm lakah a lektir mi hi zei zia na theih ma?

¹⁶Vân ah vândâwm a kal mi lakah, Pathian rianṭuan chê zia na theih ma?

¹⁷Na theihthiam lai lo, marlei thli ram lakah a hawng lêng tikah a lum zia lâwng na theih kho lai.

¹⁸Pathian nih vân a siam mi leh, thîr chang tak hâwi hen a siam mi lakah na ṭangpi kho ma?

¹⁹Kan thinlung a lâwng thlo le, sim ding zeikhawm kan nei lo rawh, Pathian sinah sim ding mi zei, hawng kan sîntir.

²⁰Pathian sinah thu ka sim awt lo rawh; zeirangah keimah veihnâk salam dingah tik ka siam piak lai?

²¹Tuah vân ah mi chêu chu mit a ser le, kannih rangah zauh ding hen a chêu tuktarâi; thli nih vân khawm a thiangtir peng.

²²Marlei chu ngûn rawng hâwi a lang le, Pathian ṭih leh zah hen kan khat.

²³Pathian chu a rokual tuktarâi ruangah kan naih kho lo. Minung fa lakah a thilti lakah â rep hen a dik asi.

²⁴Amah lakah lâu hen mikip an um mi chu a chê lo asi. Fing hen â rêl mi chu a thlawrhthlâu na.