Read Bawm Chin JOB 38 Bible Online

JOB 38 - Bawm Chin bible

JOB 38

¹Churawhchun thli thawk hen LALPA nih Job sinah thu a sim. LALPA nih

²Na theih lonâk leh thu salam hen ka finghnâk hawng ka deihtu ding mi chu âu me na si?

³Tuah dîr le, mipa hâwi hen sâng.

⁴Laikulh ka tuah liauah na um rawh ma? Na theih ual mi asi chun, a thu hawng ka simh.

⁵A lianh leh a mêt ding âu nih ruat? Âu nih a tahnâk hen tah? Chu sângnâk zawzawng chu na theih ma?

⁶Tual dirh kalhtu a tung âu nih a tleih dîr? Laikulh a ki mi lung âu nih phun?

⁷Chu ni khuadei ah ârfi tla chu a rual hen an tlâ le, vânminung tla chu lâwm hen an âu.

⁸Tual sung thawk hen tî a hawng suak liauah, tipi a luang mi kham ding hen a kawtkâ âu nih a khâr?

⁹Tipi sûm hen khuhtu leh mûi hen tuamtu chu keimah ka si.

¹⁰Tipi ramri singsiahnâk ka siam le, a kawtkâ renh dunglei kângah ka siah.

¹¹“Chu tiang nûnlêm ah a dang vawnh lah! Hinah hin na thiltikhonâk tlingtlawk chu dawng seh,” ti hen ka simh.

¹²Job, na san ah khuadei ding hen thu na pêk dah tâwn ma?

¹³Khawfîm chat nih tualmun luah ding leh misual anna thup mi ninh ding hen thu na pêk tâwn ma?

¹⁴Sûn nî chêu nih tlâng leh tivakuam tla chu nipuan thlep mi hâwi hen a langhtir le, nêng lakah dehnâk an deh mi hâwi hen a fiang.

¹⁵Sûn nî chêu chu mi sual rangah a chêu tuktarâi le, siat leh râwknâk thil an ti ding mi lakah a kham na.

¹⁶Tipi tawdeng ah na um tâwn ma? Tisumsumriat tlûn ṭuang hâwi mi tlûnah na kal ma?

¹⁷Laikulh thihnâk kawtkâ vêng chu âutal nih an zauhtir rawh ma?

¹⁸Laikulh a lianh kâng ruatnâk na nei ma? Na theih asi chun, hawng ka sâng.

¹⁹Chêu zei thawk hen a hawng, mûi umnâk chu zei thawk hen me asi, na theih ma?

²⁰An kalnâk tiang ding na simh na hen na kîrtir nawlh na kho ma?

²¹Na upa thlo rawh ruangah na ti kho ding ka ruat. Laikulh tuah liauah chun na um rawh ding hen kan ruat!

²²Rial leh vûr ka siahnâk mun ah na kal tâwn ma?

²³Râltuk leh donâk nawknâk tik rangah timhtuah chia hen ka siah.

²⁴Nî a hawng suaknâk mun ah leh, saklei thli a hawng rângnâk mun ah na va um rawh ma?

²⁵Âu nih tî luangnâk lampi a chawh hen, khuarît hen ruahpi sûrnâk lampi a siam?

²⁶Âukhawm umlonâk munah âu nih ruah a sûrtir?

²⁷Belh tla chawrh ding hen tual hul leh a châr mi lakah âu nih tî a tawih?

²⁸Ruah leh damtî nih pa an nei ma?

²⁹Vûr leh sûm nu, tipi tî khotirtu leh

³⁰lung ah changtirtu âu mesi?

³¹Zâwltling leh Ngambâwm na kawp kho na hen firuk â pûm mi tla na ṭhen na kho ma?

³²Ârfi tla hi a tik vima ah na rui kho na hen vawm a lian leh a mê mi na duhnâk zawngah na kaltir kho ma?

³³Chung vân leikâng lâirêl na theih hen, tual leikâng rangah na mang kho na ma?

³⁴Sûm tla thu na pêk na hen, ruah na sûrtir kho mazei?

³⁵Mîmthlâ chu lek ding hen thu na pêk na chun, na sinah hawng kal hen “Hinah kan um hi” an ti lai ma?

³⁶Nile tiva tî a lian awt ti hen ibis simhtu leh ruah a sûr awt mi ârkhawng rangah simhtu âu?

³⁷Sûm tla rêl kho ding hen mifing, ruah sûrtir hen,

³⁸valei lawmh ding hen âu a um?

³⁹Chakeibaknei rangah râwl na tawng piak hen, pûk ah an fa râwlṭâm tla rangah na khimtir kho hen

⁴⁰an pûk bawh ziar hen na siam kho na ma?

⁴¹Langâk tla sungvâng hen anna sawk liauah, an fa tla nih ka sinah tî-le-râwl deih hen an râk liauah âu nih châwm na?