Read Bawm Chin JOB 39 Bible Online

JOB 39 - Bawm Chin bible

JOB 39

¹Tlângah mi saza tla faring liau na theih ma? Sazuk faring liauah na ngâk ma?

²Zei tiang fa an pawi zat leh an faring liau na theih ma?

³Râlring bû hen an tlawng le, an bawk leh an tlawng cham na theih ma?

⁴Mâng ah an fa tla chu an ṭhang le, an tlei le, an nu sinah an kîr nawlh lo rawh.

⁵Âu nih mâng sanatung rangah thlah hen tlawngtirtu um?

⁶Ramkaro chu an umnâk rangah ka pêk le, chitê umnâk phâi ah ka umtir na.

⁷Khuapi thawk hen minung hâu theihlonâk ah, lât takah an um le, âukhawm nih an ngamtir hen rian an ṭuantir na kho lo.

⁸Tlâng sâng belh ningno ring dulnâk mun ah an râwl tlat hen an um.

⁹Mâng ah mi fung nih rian an ṭuan piak lai mazei? Na ran in ah zân ah um ding a duh lai ma?

¹⁰Pakhat tal ri na khih hen phâisen nâwntu ah na mang hen na phâisen na nâwn ma?

¹¹A chaknâk rokual tak chu na rianṭuan rit titu ding hen na lungum hen na ngauh san kho ma?

¹²Na fângzûnnâk ah kalpi hen, na fâng pumh leh chîltu ah mang kho ding hen na ruat ma?

¹³Ostrich thla zâp chu a chak ual a! Sikhawmsele lili âr hâwi hen a zuang kho lo.

¹⁴Tual lîn nih a ti lumtir ding hen ostrich nih tual ah a ti.

¹⁵Mi nih an kê hen an lamh salam lai ti mawh ramsa nih an khuai lai tih a ruat lo.

¹⁶Amah ti silo mi hâwi hen a âwva lo le, kilkâwi lo hen a thlawrhthlâu.

¹⁷Chu hâwi hen â leh finglo hen siamtu chu keimah ka si;

¹⁸Sikhawmsele, a tek chun rang leh a tlûnah to mi chu a nihsanh na.

¹⁹Job, rang chak tak siamtu leh an tuangmul pêktu nangmah ma na si?

²⁰Khâubawk hâwi per kho ding leh, an nâr tum hâu mi ṭhih ding hen nangmah nih ma na siam?

²¹Tivakuam ah an kê tla an puak le, an chaknâk zawzawng hen râltuknâk leiah an kal.

²²Ṭihnung a kâi zia khawm an theih lo le, nâmsâu nih khawm a kham na kho lo.

²³An tlûnah totu tla nih râlthuam an put mi chu a âwn le, nî lakah a lek sur.

²⁴Thinlung a ṭih bû hen rang chu a mâilei ah a tek le, tâwtawrâwt an hawng tum rawh chun an dîr ziar kho lo.

²⁵Tâwtawrâwt an tum kipah a phît. Râltuknâk mun tleng lânah rim a theih kho. Hotu tla nih thu an pêk na mi hâu an theih kho.

²⁶Mû nih zuang ding dân leh simlei kângah zuang ding hen a thla a pharh liauah a nan deih ma?

²⁷Tlâng sâng tak tlûnah bû khuar ding hen mupi nih na thupêk a ngâk ma?

²⁸Lungpi sâng tak tlûnah a umnâk a siam le, a sîp pâr tlûnah kulh a siam.

²⁹Chu thawk hen thah leh ei ding a kiangkam a chawnh.

³⁰A kiagkam ah mû nih ruak a khawng le, a fa tla nih a thî an din.