Read Bawm Chin JOB 42 Bible Online

JOB 42 - Bawm Chin bible

JOB 42

¹Job nih LALPA chu a sâng. Job nih,

²LALPA thiltikhonâk na nei le, na duh mi zawzawng na ti kho ti ka nan theih.

³Zeikhawm theihlo hen ka um liauah, zeitin na finghnâk deih ding hen na ka ti. Ka theihthiam lo mi thil tla, ka rangah theih ding hen a rokual tuktarâi mi thilchê tla ka sim.

⁴Na thudeih sâng ding ka tum liauah, ka thusim ngâi na ka ti.

⁵Churawhchun, midang nih an ka simh mi lâwng ka theih le, tu lam chu keimah mit ngelchel hen ka nan muh rawh.

⁶Churawhchun, thu ka sim mi zawng ruangah thungâi ka ning a zak le, vachâm leh valeidip lakah ka rim rawh.

⁷LALPA nih Job sinah thu a sim thluh rawh chun Eliphaz sinah, “Ka to-aw Job nih a ti mi hâwi hen ka thâwngthâng hi dik tak hen nan sim lo ruangah nang leh na hâwi tlûnah ka thinrun.

⁸Tuah nanmah rang dingah chawchal pasarih leh dawrâ chal pasarih Job sinah kalpi ule, bâwlnâk rangah ap u. Job nih thla an cham piak na lai le, kei nih a thlachamnâk ka sâng lai le, nan ti mi hâwi hen nan rangah ningzak a kâi lai loh. Anih nih a ti mi hâwi hen ka thu hi dik hen nan sim lo,” a ti.

⁹Eliphaz, Bildah leh Zophar nih chun LALPA nih a simh na mi hâwi hen an ti le, LALPA nih Job thlachamnâk a sâng rawh.

¹⁰Churawhchun Job nih a hâwi pathum rangah thla a cham piak na le, LALPA nih sul-le-lam tluangnâk alân ngâk hen a lehnih hen a pêk nawlh.

¹¹Job unau, a farnu tla leh a lânah a hâwi tla nih an hawng veh le, a sinah puai an ei. An dâwtnâk leh a lânah LALPA nih a tlûnah lawksawngnâk a hawng tlungtir mi lakah thla an ngamh le, thu an sim. An ektê hen tangka leh ngûn pizung tla an pêk.

¹²LALPA nih Job chu a san dih leikângah a tîr mi ngâk hen tam dauh malsâwmnâk a pêk. Dawrâ sâng leili, sangâwngsâu sâng ruk, ran lakah a lupu dauh sâng nih, leh sanatung sâng khat.

¹³Fapa pasarih leh fanu pathum a nei.

¹⁴A fanu upachem mi chu Jemimah a ti, a panihnâk chu Keziah, a ngâksia chem mi chu Keren Hapuk a ti.

¹⁵Job fanu hâwi hen mi mêlṭha âu nunau khawm laikulh ah an um lo. An pa nih an ṭa tla hâwi ber hen ro tingvo a pêk na.

¹⁶Job chu hi nûnah hin kum zâ leh sâwmli a dam le, a tu leh tusin a muh tiang a dam.

¹⁷Tarkhên hen a thi.