Read Bawm Chin JOB 5 Bible Online

JOB 5 - Bawm Chin bible

JOB 5

¹Job, kawh na nik, an sângtu a um rêng ma? Na hawi khonâk ding mi vânminung rêng a um ma?

²Vûirâmnâk ruangah lungsilo bû hen thihnâk chu mi â zeikhawm theihlo mi ti dân asi.

³Mi a himnâk hâwl mi ka muh le, sikhawmsele an in chu siat ka barh na.

⁴An fapa tla nih himnâk rerêng an tawng lai loh. Lâirêlnâk ah khawm pakhat khawm anna hum kho lai loh.

⁵Mi sungvâng tla nih mi â buh an ei lai le, ling nâwngah fâng a kho mi tiang, mi tîhâl tla nih a neih an nahsuah lai.

⁶Sualnâk chu tual lakah a kho mi asi lo, nawknâk khawm tual lakah a kho mi asi lo.

⁷Minung chu amah nawknâk a tuah le, vân leiah meichi a zuang mi hâwi hen.

⁸Kei hi nangmah hâwi si sele, Pathian leiah ka hawi lai le, ka thu a sinah ka tlunh lai.

⁹Thil rokual a ti mi tla chu kan theihthiam kho lo, a thilchê ti khawm nih dawngh a nei lo.

¹⁰Ram lakah ruah a sûrtir le, phâisen tla chu tî a tawih.

¹¹Asi, mi nâu tla sângtu chu Pathian asi le, thinlung sia zawzawng sinah lâwmnâk a pêk na.

¹²Mi krai thiam thiltum chu a lâwt le, mifing tla chu anmah krai nih a tângtir na le, churuangah zei lak khawmah anna dingchang lo.

¹⁴Sûn nî tang khawmah mûi lakah dap mi hâwi an si.

¹⁵Sikhawmsele mipâm chu thihnâk ah mi Pathian nih a hum le; ṭangpi herh tla chu nehsawhnâk lakah mi ruang a suah na.

¹⁶Mipâm tla rangah lungumnâk a pêk le, misual tla chu a rehtir dep.

¹⁷Pathian nih a zauhfiang mi minung chu a thaw a suak. Nun an simh liauah lungsilo lah.

¹⁸Pathian nih a liamh mi chu a tuam piak nawlh. Amah kut hen nganfâk an pêk le, amah kut ber nih a nan damh.

¹⁹Zeiliau zawngah nganfâknak lakah mi a nan hum lai.

²⁰Pâm hawng tlung tik khawmah nungdam hen an kilkâwi lai le, râltuk lakah mi khawm a nan hum lai.

²¹Minsiatnâk lakah mi Pathian nih a nan hum lai le, siatnâk a hawng tlung tik khawmah ruang a nan suah lai.

²²Veihnâk leh sungvângnâk lakah na ni lai, ram sa tla khawm na ṭih na lai loh.

²³Na phâisen nâwn lakah khawm lung a um lai loh. Sarâng khawm nih a nan seh lai loh.

²⁴Na puanin sungah thlangam tak hen na um lai le, na dawrâ rual tla na zauh na tik khawmah him ziar hen na muh na lai.

²⁵Ram ningno ah belh tla hâwi hen, fa tla tamtak na nei lai.

²⁶Fâng a zûn tikah a min tiang a um hâwi hen, nang khawm tarkhen hen na dam lai.

²⁷Job, hi vial tla hi sâwt tak thawk hen kan theih mi rawh. A dik asi, tuah pawm ko rawh.