Read Bawm Chin JOB 6 Bible Online

JOB 6 - Bawm Chin bible

JOB 6

¹Ka ngaihsiatnâk leh ka lawksawngnâk hi khîng lakah khingh mi si sele,

³tipi mi sep ngâk hen a rit dauh lai le, churuangah chun ka duh thu ka sim mi hi chê na ti lai loh.

⁴Zeizawng tikho Pathian nih a thalzum hen hawng ka sunh le, chu tûr chu ka taksa pum hen a khat. Pathian nih ṭihnung a kâinâk chu a tlar hen a siah.

⁵Sanatung khawm belh a pêt liauah a lungâwi le, chawpê khawm fapawn a ei liauah a dâisip.

⁶Sikhawmsele, thâwtnâk leh alnâk neilo mi buh âu nih a ei kho? Ârti dul khawm nih zei me thâwtnâk a nei?

⁷Chu hâwi hen kei khawm buh ei ding ka kâ a thâw lo, ka thil ei nih zâwtnâk hawng ka pêk.

⁸Zeirangah ka deih mi chu Pathian nih hawng ka pêk lo zia? Zeirangah thla ka cham mi hawng ka sâng lo zia?

⁹Keimah lâwng ka si chun ka mâi ah kal hen hawng ka thah ving.

¹⁰A ti ding mi chu kei nih theih sele, lâwm ruangah ka lawk lai le, ka nganfâk tuar tla hi pawi ka ti lai loh. Pathian chu â thenhlimh ti ka theih; thu hawng ka pêk mi chu ka êl dah loh.

¹¹Nung ding hen zei chaknâk me ka nei? Lungumnâk neilo pet hen zeirangah ka dam ko?

¹²Lung hen siam mi ma ka si? Ka taksa hi dâr ma si?

¹³Him ding hen chaknâk ka nei lo rawh, hinah hawng ka ṭangpi ding hen sâwm ding ka nei lo.

¹⁴Hi hâwi ka lawksawngnâk lakah hin hâwi zumhkâi ka herh. Pathian kaltâk ual, kaltâk lo ual hen, ka um mawh umlo mawh.

¹⁵Sikhawmsele, nannih ka hâwi tla, tivatê a luang mi ruah a sûr lo rawh chun a kang ving hâwi hen nan hawng ka perpet.

¹⁶Tivatê tla chu vûr leh sûm nih a khuh le,

¹⁷sikhawmsele nî a sa mi lakah an tlâu le, Tivatê mi tili chu hul hiam hen an um.

¹⁸Ran tlûnah chuan hen sawlehtu tla nih tî an hâwl mi an tawng lo le, anna sawknâk ah ramkaro ah an thi.

¹⁹Seba leh Tema thawk hen mi sawlehtu tla nih saw an leh le,

²⁰sikhawmsele, tikangva kiangah an lung a dawng thlo.

²¹Nannih tla hi kei rangah chun chu tiva hâwi nan si, ka thihnâk nan muh le, ningṭih nan hawng ka phaih.

²²Thil thawt hawng ka pêk ding hen ma kan deih na? Asi lo leh, ka ruangrûl ah nawhnâk pêk ding hen ma kan ti na.

²³Mêlma mawh misual lakah mi hawng ka hum u kan ti na ma?

²⁴Asi ma chu, hawng ka simh ule, ka sualnâk hawng ka simh u, dâisip hen kan ngâi na lai.

²⁵Thudik chu lung a kâi, sikhawmsele thu-do-tla-lo nan sim.

²⁶Ka thusim hi zeikhawm silo, thli salam hâwi hen nan ruat. Chu hâwi asi chun zeikhawm silo mi ka thu hi nan sâng.

²⁷Sal ngâkṭah tla rangah changhnâk nan siam khawmah nanmah leh nan hâwi tla rangah neihnâk nan siam mi asi.

²⁸Hawng ka zauhnik u, âwkrâwl thu ka sim ding asi lo.

²⁹Nan palh zia a fâk tuk rawh, rep lo hen um lah u rawh. Hawng ka sâwi lah u, ka dik asi.

³⁰Sikhawmsele, nannih nih âwkrâwl thusim hen nan ka ruat. A diklo mi lakah thudik sim kho lo ding hen nan ka ruat.