Read Bawm Chin JOB 9 Bible Online

JOB 9 - Bawm Chin bible

JOB 9

¹Asi, chubang zawzawng chu a lânah ka theih hep mi rawh. Mi nih Pathian lakah a mawh rawh mi zeitin a âwl kho lai?

³Âu nih anih chu êl kho lai? Mi nih sâng kho lo mi thu vei sâng a deih kho.

⁴Pathian chu thungâi a fing le, thil a ti kho; amah do khotu âukham an um lo.

⁵Tlâng tla chu simkan lo hen a ṭhial na le, thinrunhnâk hen a veih na.

⁶Pathian nih lî a nîntir le, tual tla â nîn; tual dirhkalhtu dingah lungpi tla a siah.

⁷Nî suak lo ding hen khawm a tuah kho le, Ârfi tla khawm zân ah chêu lo hen a umtir kho.

⁸Pathian nih vân a siam liauah âukhawm nih an bawmh lo. Tipi mi thilnung lian kêng tlûn a lamh.

⁹Vân ah Pathian nih ârfi tla, rokualnâk langhtirtu a siah, Orion ârfi, pleiades ârfi, leh simlei ârfi.

¹⁰Pathian nih thil rokual a ti mi tla chu kan theihthiam châwk lo le, a thilchê ti tla khawm dawngh a nei lo.

¹¹Pathian a hawng kal vima le, khawmsele ka muh lo.

¹²A duh mi zawng a lâk le, âukhawm nih a khap kho lo. “Zei me na ti?” ti hen âukhawm nih an deih ngam lo.

¹³Pathian thinthawknâk chu a um kumza, a mêlma tla, Rahab bawmhtu leh tipi ah thilnung lian nih amah an do.

¹⁴Churuangah Pathian rangah zeitin ka sâng kho lai?

¹⁵Kei hi mawhlo menza khawmsele, ka ti kho mi chu ka lakah lâirêltu Pathian sinah khuaruatnâk deih ri cho asi.

¹⁶Chu hâwi mi lakah thu hawng ka simtir chun, hawng ka ngâi piak ding hen ka lung a um lo.

¹⁷A san umlo thlo hen keimah vuak ding leh liamh ding hen thlipi a hawng fial.

¹⁸Ka thawsuak ding khawm a siang lo, lungfâknâk karo hen ka dam liau ni tla a khattir.

¹⁹Zângran ko hen ka ṭang lai ma? Pathian ka zângnâwr lai ma? lâirêlnâk ah ka kalpi lai ma? Âu nih anih kaltir lai?

²⁰Keimah chu sual lo hen zumhkai ka si, ka aw-hau suah lam chu a sual le, ka sim mi zawng chu keimah mawh hep hen a lang.

²¹Kei lam chu ka mawh lo, sikhawmsele ka thiamthih lo rawh. Damlo hen ka um, sual seh, sual lah seh zeikhawm asi lo; Pathian nih hawng ka veih awt nget.

²³Sualnâk neilo minung a thi ka hen Pathian a nihsuak.

²⁴Laikulh chu misual tla rangah Pathian nih a pêk. Lâirêltu zawzawng mit a châwtir. Pathian nih ti lah sele, âu nih a ti lai?

²⁵Ka damliau ni tla chu a vei vima le, chu lakah pakhat khawm a ṭha mi a um lo.

²⁶Ka nungnâk chu lawng a chak chem mi hâwi hen a kal le, zungnampi châwi ding hen mupi â thlûr mi hâwi hen a chak.

²⁷Ka nganfâknâk hi philh ding hen ka ni khawmah, ka ngânfâk nih hawng ka tlunh nawlh nget le, Pathian nih sual hen a hawng ka siam ti ka theih.

²⁹Sual hen ruat ka si liau khawmah, zeirangah ka nawktir êu lai?

³⁰Zei sabung khawm nih ka sual chu a thiangtir kho lai lo.

³¹Nâwm lakah Pathian nih hawng ka lawnh le, ka nipuan tla chu ka rangah ningzak a kâi.

³²Pathian chu minung si sele ka sâng kho lai, kan thunawk sim ding hen lâirêlnâk ah kan kal kho lai.

³³Sikhawmsele, kan kar lakah âukhawm an hawng a tel kho lo. Pathian leh kei rangah thu thlûktu âukhawm an um lo.

³⁴Pathian, na ka rêp mi hi bâng rawh. ṭihnung na kâinâk chu lawnh ving!

³⁵Thusim ding ka ṭih loh, ka thinlung hi keimah nih ka theih ko ruangah.