Read Bawm Chin SAM 10 Bible Online

SAM 10 - Bawm Chin bible

SAM 10

¹LALPA, zeirangah lât takah na umâ Zeirangah kan lawksawng liauah na thupâ

²Misual tla chu anna zîm le: mipâm tla an nehsawh; an thang tunh lakah awhtir na.

³Misual nih a duhnâk sual â putso; mi hamkah nih LALPA chu siat a barh le, a nawng.

⁴Misual nih chun LALPA chu a sunhsak lo; a putsonâk thinlung hen Pathian chu zeikhawm silo hen a ruat.

⁵Misual chu thil zeizawng ah a dingchang. Pathian lâirêl a theihthiam kho lo; a mêlma tla a nihsanh.

⁶A thinlung hen, “Ka palh dah lai lo le, ka lawk khawm a sawng dah lai loh” a ti.

⁷A kâ chu siatbarhnâk tla, âwkrâwl tla, thihnâk tla hen a khat; Thusual leh huatnâk sim a mawhlah.

⁸Khua ah â thup le, chunah chun sual neilo tla thah ding hen a bawh na le, ṭangpitu neilo a rêl mi chu a thlingthlâk le,

⁹chakeibaknei hâwi hen â thupnâk mun ah a bawh na. Ngâkṭah tla rangah a bawh na le, a thang hen a awh na le, a nûk ving na.

¹⁰Ṭangpitu neilo an tlû mi chu, tharum hen a neh na.

¹¹Misual nih a thinlung hen, “Pathian nih a sunhsak lai lo! a mit a sîm le, hawng ka muh lai loh,” a ti.

¹²LALPA, misual tla chu rêp na, a tuar mi tla chu theihkumza na!

¹³Misual nih a thinlung hen Pathian chu zauhnawmh hen hawng ka rêp lai lo zeitin a ti kho ziaâ

¹⁴Mi ngaihsia leh tuartu tla chu na muh hen na theih le, ṭangpi ding na tîm kumza, mi ṭangpi herh tla chu na sinah anna pêk le; na ṭangpi kumza na.

¹⁵Mi ṭhalo leh misual tla chu an thiltikhonâk veih piak na le; an thilsual ti ruangah an rim lân lo chu rêp na.

¹⁶LALPA chu zungzâl lalchem asi. A ram ah mi Pathian dang tla sawnhtu chu a veih hep na lai.

¹⁷LALPA, mi nau tla thlachamnâk chu na ngâi piak lai le; râlṭhatnâk na pêk lai.

¹⁸Ngâkṭah leh nehsawh hen um mi tla ṭapnâk chu na ngâi lai le, siherh hen lâi na rêl piak na lai, thikho mi nih ṭihnâk an tawng lai lo rawh.