Read Bawm Chin SAM 102 Bible Online

SAM 102 - Bawm Chin bible

SAM 102

¹LALPA ka thlachamnâk hi ngâi le, ṭangpi deih hen ka âu mi hi ngâi.

²Lawksawng hen ka um liauah hawng ka hertâk lah! Hawng ka ngâi le, ka nan kawh tikah khulrang hen hawng ka sâng!

³Ka nungnâk chu meikhâ hâwi hen a vei le; ka taksa hi mei hâwi hen a kâng.

⁴Belh a châr mi hâwi hen vuak dep hen ka um le; ka buh duhnâk khawm a tlâu ving.

⁵Fâk tak hen ka rûm le, ka vun leh ruh cho hen ka um.

⁶Ramkaro ah mâng ah mi va hâwi hen ka um, â siat leh râwk rawh mi lakah sêmbuh hâwi ka si.

⁷Ka zâu bû hen ka meng ko le, in tlûnah va thim pem mi hâwi ka si.

⁸Nâ tlêk hen ka mêlma tla nih an ka salh le; Hawng ka siarlotu tla nih min sim hen siat an ka barh.

⁹Na thinrunhnâk leh na thinthawknâk ruangah vachâm chu ka buh asi, ka din mi chu ka mitthli nih a chawmh. Na ka thur le, na ka lawnh ving.

¹¹Ka nungnâk chu nî tlêk lei dâidul hâwi asi le; belh châr hâwi ka si.

¹²Sikhawmsele, LALPA, nang chu zungzâl lalchem na si; thlâk zawzawng nih an theihkumza lai.

¹³Na thawk lai le, Zion chu na lungkham lai; amah khua na ruat tik a tlung rawh; hi hi a tik tak asi.

¹⁴Na to-aw tla nih an dâwt, siat leh râwk hen um menza khawmsele; a lakah lungkhamnâk an nei, râwk hen um menza khawmsele.

¹⁵Phun tla nih LALPA chu an ṭih lai le; Tual ah lal zawzawng tla nih a thiltikhonâk chu an ṭih lai.

¹⁶LALPA nih Zion a dirh nawlh tik chun a rokualnâk a langh lai.

¹⁷A kaltâk mi minung tla a âwva lai le, an thlachamnâk a ngâi lai.

¹⁸Thlâk a hawng um mi le tla rangah LALPA nih thil a ti ding mi chu rân rawh, suak lo rih mi khawm nih amah chu an sawr khonâk ding hen.

¹⁹LALPA nih chun a mun thenhlimh sâng tak thawk hen a hawng bih le, vân thawk hen tual chu a hawng bih.

²⁰Rângtlâ rûm hâu tla a theih le, thi ding hen an mawhtir rawh mi tla chu a suah na.

²¹Phun tla leh lalram tla anna pûm hen LALPA an sawr tikah chun, Zion ah chun a min chu an phuang lai le, Jerusalem ah amah an sawr lai.

²³LALPA nih chun ngâksia ka si liauah chaklo tak hen hawng ka siam le; ka san a tâwitir.

²⁴Pathian, ka tar lânah hawng ka lâk ving lah; LALPA, nang chu na nung kumza.

²⁵A lân thawk hen tual chu na tuah le, nangmah kut tak hen vân chu. na siam.

²⁶An vei lai le, nang lam chu na um lai. puan hâwi hen an nawh ver lai le, na nawng lai le, an vei lai.

²⁷Nang lam chu na mun kumza le, na san khawm dawng kho mi asi lo.

²⁸Kan fa tla chu himnâk ah an um lai le, nangmah zauhkhenhnâk tangah an thlâk tla chu an um lai.