Read Bawm Chin SAM 103 Bible Online

SAM 103 - Bawm Chin bible

SAM 103

¹Ka thlarau, LALPA chu sawr rawh! Ka pumpiluk, LALPA min thenhlimh chu sawr rawh.

²Ka thlarau, LALPA chu sawr rawh; a vâlneih zia chu philh lah.

³Ka sual zawzawng a ka ngaihdam hen ka nganfâk zawzawng a damh.

⁴Thlân ah kal ding mi a ka hum le, khuaruatnâk leh dâwtnâk hen mal hawng ka sâwm.

⁵Ka nungnâk chu thil ṭha hen a khattir le, mupi hâwi hen ka tlangvâl hen ka chak khonâk ding hen.

⁶LALPA nih chun nâuneh hen um mi tla rangah sunhsak tak hen lâi a rêl le, thuneihnâk a pêk na.

⁷Mosi sinah a thiltum chu a langh le, Israel mi tla chu a thilti chak zia a muhtir na.

⁸LALPA chu khua a ruat hen mi a dâwt, a nunfual hen dâwtnâk dawng lo hen a khat.

⁹Nunsimh a bâng lo; a thinthawk kumza lo.

¹⁰Kan sual hâwi hen hawng kan rêp lo le, thilsual leh thil diklo kan ti mi hâwi hen lehrâl hawng kan sam lo.

¹¹Tual tlûn leiah vân a sâng mi hâwi hen, amah zahtu rangah a dâwtnâk a rokual.

¹²Sak leh thlang anna lât hâwi hen, kan lakah mi sual chu kanmah thawk hen lât takah a ṭhial.

¹³Pa nih a fa tla lakah thinlung a nei hâwi hen, LALPA nih amah zahtu tla lakah thinlung a nei.

¹⁴Zei hen siam kan si ti a theih; valeidip kan si mi khawm a theihkumza.

¹⁵Kannih rang chun, kan nungnâk chu belh hâwi cho asi. Mâng chawmpâr hâwi hen kan kho hen kan ṭhang;

¹⁶thli nih a sêm le, a vei ving âukhawm nih an muh nawlh lo rawh.

¹⁷Sikhawmsele, amah zahtu tla rangah LALPA dâwtnâk chu zungzâl tiang asi, a ṭhatnâk chu thlâk tla zawzawng tiang hen a um.

¹⁸Amah thupêk lakah dik tak a umtu tla leh a dîn thu lakah zumhkâi hen umtu tla sin khawmah.

¹⁹LALPA nih a laltophah chu vân ah a toh le, zeizawng tlûnah lalchem ah a um.

²⁰Nannih vânmifial chak tak leh thiltikho tak tla, a dân thu zûltu leh a thusim ngâitu tla, LALPA chu sawr u.

²¹Vân ah thiltikhonâk zawzawng tla, amah rianṭuantu tla, a duhzia titu tla! LALPA chu sawr u.

²²A lâirêlnâk sungah thilsiam zawzawng tla, LALPA chu sawr u. Ka thlarau, LALPA chu sawr rawh!