Read Bawm Chin SAM 104 Bible Online

SAM 104 - Bawm Chin bible

SAM 104

¹Ka thlarau, LALPA chu sawr rawh! LALPA, ka Pathian, na rokual a! Rokualnâk leh lalnâk hen na thuam;

²chêu hen na thuam. Puanin hâwi hen vân chu na zâr le,

³tî tlûnah na in chu na sak. Sûm tla chu kari hâwi hen na mang. Thli thla tlûnah na chuan.

⁴Thli chu mifial hâwi hen na mang; mîmthlalek chu na to-aw hâwi hen na mang.

⁵Tual chu a siahnâk mun ah bir tak hen na siah le, Zeitik khawm a châng lai lo.

⁶Thuam hâwi hen tisumsumriat chu a tlûnah na siah, tlêng sâng tak tla chu tî nih a khuh.

⁷Tî chu na fâi le, an tek; na thupêk hâu an theih rawh chun an tek ving.

⁸Tlâng tlûnah chun an luang le, tiva leiah an lât, an rangah mun na siam piak na mi leiah chun.

⁹Zeiliau khawmah kanh kho lo ding hen ramri na siam piak na, tual chu an khuh nawlh lonâk ding hen.

¹⁰Tinungva chu hawr ah na luangtir le, tiva tla chu tlêng leh tlêng karah na luangtir.

¹¹Ramsa tla rangah tî an pêk le; sanatung tla chunah chun an tîhâl an riamtir.

¹²Thing tla kiangkam ah chun va tla nih bû an khuar le, an âwn.

¹³Vân thawk hen tlêng tlûnah ruah na sûrtir le, tual chu na malsâwmnâk hen a khat.

¹⁴Ranrual rangah belh na ṭhangtir, thlâi chu minung rangah, thlâi chî chu a chîng khonâk ding hen.

¹⁵Amah lawmhtir ding hen uain tla suah ding hen leh oliv sariak nih chun amah lawmhtir ding hen, sang tla nih chun amah chaktir ding hen.

¹⁶Lebanon tlêng ah sidar thing tla nih chun ruah tamtak an tawng. LALPA tâ a phun mi chu an si.

¹⁷Chunah chun va tla nih an bâ an khuar le, vachâ tla nih fâr thing lakah bâ an khuar.

¹⁸Tlâng sâng tla chu sathar umnâk asi; Badger tla chu lungkak sungah an um.

¹⁹Thlâ chu thla singsiahnâk ding hen na siam le, nî nih chun tlêk tik ding a theih.

²⁰Zân na siam le, mûi lakah ramsa zawzawng an hawng suak.

²¹Chakeibaknei fa tla nih ei ding an tawng chun an hûk, Pathian nih a pêk na mi buh an chuanh hen.

²²Nî a suak chun an kîr le, an umnâk mun ah an bawk.

²³Chun, minung tla chu an rianṭuan ding hen an suak le, zânlei tiang hen an ṭuan.

²⁴LALPA, thil tamtak na siam! An ektê hen fing tak hen na siam na. Na thilsiam hen tual a khat.

²⁵Tisumsumriat kâu tak leh lian tak a um, chunah chun rêl châwk lo thilsiam tla an um, a lian mi leh a mê mi hen.

²⁶Churawhchun, timeilawng nih a zawh le, tipi ah thil lian tak na siam mi sungah Leviathan an pang.

²⁷An duh tik zawngah an ei ding buh na pêk na ding hen nangmah lakah anna ngauh hep.

²⁸Na pêk na le, an ei; buh na vauh na le, an khim.

²⁹Na hawitâk na chun, an ningṭih; an thaw na lâk piak na chun an thi le, an hawng a sêmnâk valei lîlâ ah an kîr nawlh.

³⁰Sikhawmsele, thaw na pêk na chun, anna siam. Tual sinah nungnâk thar na pêk.

³¹LALPA rokualnâk chu zungzâl tiang hen um seh! LALPA chu a thilsiam lakah a lâwm seh!

³²Tual a zauh le, tual chu a thir; tlâng sâng tla a tawngh le, meikhâ an suah.

³³Ka damsung zawzawng ah LALPA sinah la ka sak lai; ka damsung zawzawng ah ka Pathian sawr hen la ka sak lai.

³⁴Ka la sak lakah a lâwm sele, amah thawk hen ka lâwm mi asi ruangah.

³⁵Tual ah mi misual tla chu veih hen um seh; mi ṭhalo chu um lah rawh seh. LALPA chu sawr u!