Read Bawm Chin SAM 105 Bible Online

SAM 105 - Bawm Chin bible

SAM 105

¹LALPA sinah lâwmthu sim ule; a rokualnâk phuang u; a thilti chu phun tla simh na u.

²LALPA sawr hen la sak ule, thilchê a ti mi tla chu sim u.

³Amah tâ kan si ruangah a lâwm u; amah sawnhtu tla zawzawng a lâwm na seh.

⁴An ṭangpi ding hen LALPA sinah kal le, amah chu sawnh vima.

⁵Nannih a to-aw, Abraham thlâk tla; A thîm mi Jakob thlâk tla: thilchê a timhtuah mi leh lâirêlnâk a pêk mi chu theihkumza u.

⁷LALPA chu kan Pathian asi; a thupêk chu laikulh zawzawng rangah asi.

⁸A thudîntuk chu zungzâl hen a kil lai, a thutiam chu thlâk sâng khat tiang hen.

⁹Abraham sinah a thutiam chu a kil kumza lai, Isak sinah a thutiam khawm.

¹⁰Jakob sinah thudîn LALPA nih a tuk le, kumleza hen um ding mi pakhat chu.

¹¹“Kanaan ram chu ka nan pêk lai,” a ti. “Nangmah tâ bâk asi lai,” a ti.

¹²Pathian mi tla chu an tâwm ual, Kanaan ram ah chun khual an si.

¹³Umnâk vâi hen ram khat thawk hen ram dang, lalram thawk hen lalram dangah an kal.

¹⁴Sikhawmsele anmah nehsawh ding hen Pathian nih pakhat khawm a siang na lo; anmah hum ding hen lal tla chu ningṭih a phaih na.

¹⁵“Ka to-aw thîm tla chu nganfâk pêk lah u; ka khuavêng tla tawngh lah u,” ti hen.

¹⁶LALPA nih an ram ah pâm a tlungtir le, an buh tla a lâk piak hep na.

¹⁷Sikhawmsele, an lû ding hen Josef sal ah an zuar mi kha a fial.

¹⁸A kê chu thîr chikchîn hen an khih le, a ngâwng ah thâr hen an khimh,

¹⁹simkanh mi a dik ti a tlung lân lo chu. LALPA thu nih a diktir.

²⁰Aigupta lal nih amah chu a suah rawh; phun tla lâirêltu chu a thlah rawh.

²¹A lâirêlnâk ah thuneitu sinâk a pêk le, Ram sung zawzawng ah lâirêltu ah a siam,

²²a lalnâk thiltikhonâk hen leh thuneihnâk hen krai pêktu tla chu sîntir ding hen.

²³Jakob chu Aigupta ram ah a kal le, chunah chun a va um rawh.

²⁴LALPA nih a mi tla chu tâ leh fa tamtak a pêk na le, an mêlma tla ngâk hen chak dauh hen a siam na.

²⁵A mi tla chu Aigupta mi a huatir na le, a to-aw tla chu zauhnawmh hen a nehsawhtir na.

²⁶Churawhchun a to-aw Mosi leh Aron a thîm na mi chu a fial na.

²⁷Pathian thiltikhonâk an va ti le, Aigupta ah chun thilchê tla an ti.

²⁸Pathian nih ram lakah mâi a tlungtir le, sikhawmsele Aigupta mi nih a thupêk an zâl lo.

²⁹An tiva tla chu thisen ah a changtir le, an ngâ zawzawng a thi hep.

³⁰An ram chu chu-uh a tlungtir le, lal in tiang an khat hep.

³¹Pathian nih thovâi leh rik tla thu a pêk le, ram pumpi a khat phak.

³²Ruah sûrtir lo hen ṭek leh rial a tlûktir.

³³Grep zûn leh theipi kûng tla a râwk le, thing zawzawng a khiak hep.

³⁴Khâubawk tla thu a pêk le, rêl châwklo an hawng tlung.

³⁵Ram lakah thlâi phun leh châng mi zawzawng an ei hep.

³⁶Aigupta ram ah dâwngsungkhur lakah fapa upachem a thah ver na.

³⁷Chun Israel tla chu a suaktir na le, tangka leh ngûn tla an kalpi, ṭhisel leh chak tak hen an um.

³⁸Aigupta mi tla nih an ṭih na, van kaltâk na mi chu thungâi anna lâwm.

³⁹Pathian nih a mi le tla tlûnah sûm a umtir le, anmah cherhtu rangah zân ah mei a pêk na.

⁴⁰An deih le, mâmte tla a pêk na; anmah tla khimtir ding hen vân thawk hen buh a pêk na.

⁴¹Lungpi chu â awng le, tâ a hawng suak. ramkaro mun ah tiva hâwi hen a luang.

⁴²A to-aw Abraham sinah a thuthup tiamh chu a theihkumza.

⁴³Churawhchun a thîm mi minung tla chu a suakpi na le, La an sak le, lâwm hen an âu.

⁴⁴Midang tla ram chu a pêk le, an phâisen tla chu a lâktir na.

⁴⁵Churawhchun a mi le tla nih a dîn thu tla chu an zûl hen a thupêk tla an zûl khonâk ding hen. LALPA chu sawr u!