Read Bawm Chin SAM 109 Bible Online

SAM 109 - Bawm Chin bible

SAM 109

¹Pathian, dâisip hen um lah ka nan sawr asi!

²Mi ṭhalo leh mi âwkrâwl tla nih an ka do, ka thu chu diklo hen an sim.

³Ṭhalo tak hen an ka sim, a san zeikhawm umlo hen an ka do.

⁴Ka dâwt hen an rangah ka deih piak khawmsele an ka do.

⁵Thil ṭha chu thilsual hen an ka rulh, dâwtnâk chu huatnâk hen an ka rulh.

⁶Ka mêlma tla lakah siatnâk hen lâirêl piak na, amah leikâng mi minung pakhat amah phiar ding hen ruat.

⁷Anih chu nik hen um sele, a deihnâk chu amah mawhnâk si seh.

⁸A san chu dawng tuan seh; midang nih a rianṭuan mun luah seh!

⁹A fa le tla chu roh leh ngalh hen um na seh, a nupi chu numei si seh!

¹⁰A fa tla chu dawrnâk neilo hen kut dawnh na seh. Siatnâk mun ah mi chu nar hen um na seh!

¹¹A lei taih mipa nih a neih zawzawng lâk piak hep seh; a ṭuan tha zawzawng chu khual nih a ting hep seh.

¹²Âukhawm amah siherhtu um lah seh, a dunglei ah a rauh na mi zauhkhenhtu khawm um lah seh.

¹³A thlâk zawzawng thi hep na seh, a thlâk nawlh tla lakah a min puang lah seh.

¹⁴A thlâktu tla thilsual ti chu LALPA nih theihkumza seh, a nu sualnâk khawm ngaihdam si rêng lah seh.

¹⁵An sualnâk chu LALPA nih theihkumza seh, sikhawmsele philh dep hen um na seh!

¹⁶Chu minung chu khuaruat lo hen, mipâm leh ṭangpi ngâi a nehsawh na le, a thah na.

¹⁷Siatbarh asi khonâk ding hen siatbarh a duh! Âukhawm nih bâwngmal sâwm lo ding hen bâwngmal sâwm a hua!

¹⁸A dîn hâwi hen siatbarh chu amah umdîn ah â neih; Amah siatbarhnâk tî ah a nîm hâwi hen amah siatbarh lakah a nîm sele, a ruh lakah chun sariak hâwi si seh!

¹⁹Puan hâwi hen a aih sele, tâisâwm hâwi hen a sâwm kumza seh!

²⁰LALPA, chubang thilsual ka lakah titu ka mêlma tla chu rêp na rawh!

²¹Sikhawmsele, LALPA, ka Pathian, na thutiam hâwi hen hawng ka ṭangpi le, na dâwtnâk ruangah hawng ka hum rawh.

²²Ṭangpi ka herh hen ka pâm; ka thinlung a fâk.

²³Zânlei dâidul hâwi hen ka vei awt ko rawh; rannung hâwi hen sêm ving ka si.

²⁴Buh ka tawng lo ruangah ka khup tla a zê, zeikhawm ka si lo rawh, vun leh ruh cho hen ka um.

²⁵Mi nih an ka muh le, an ka nihsanh; an lâ an lei le, an ka zauhnawmh.

²⁶LALPA, ka Pathian, hawng ka ṭangpi, na dâwtnâk dawng lo ruangah ruang hawng ka suah.

²⁷Nang chu ruang na ka suahtu na si zia ka mêlma tla rangah theihtir na.

²⁸Siat an ka barh khawmsele nangnih mal na ka sâwm lai. Hawng ka nehsawhtu tla chu neh hen um na seh, kei, na to-aw lam chu a lâwm seh.

²⁹Ka mêlma tla chu ningzak saih hen um na seh; an ningzaknâk chu thuam hâwi hen a aih na seh.

³⁰LALPA chu hâu fâk tak hen lâwmthu ka simh lai; mi zapi tla pumhnâk ah amah chu ka sawr lai.

³¹Anih nih chun mipâm tla chu a hum na le, thi ding hen an mawhtir na mi chu ruang a suah na ruangah.