Read Bawm Chin SAM 113 Bible Online

SAM 113 - Bawm Chin bible

SAM 113

¹LALPA chu sawr u! Nannih LALPA to-aw tla, a min chu sawr u!

²A min chu tuah leh zungzâl tiang hen sawr hen a um lai.

³Saklei thawk hen thlanglei tiang hen LALPA min sawr u.

⁴LALPA nih phun zawzawng tlûnah lâi a rêl, a rokualnâk chu chung vân ah a um.

⁵LALPA kan Pathian hâwi hi pakhat khawm an um lo, tlûnlei ving ah a um.

⁶Sikhawmsele, tual leh vân zauh ding hen a kûn.

⁷Valeidip ah mi mipâm chu a thawh; ṭangpi herh tla anna hamhnâk lakah mi chu a châwi na le,

⁸a mi le lal tla hâwi rangah a siam na.

⁹Nupi fa neilo chu a in ah a thang a ṭhattir le; fa tla pêk hen a lawmhtir. LALPA chu sawr u!