Read Bawm Chin SAM 115 Bible Online

SAM 115 - Bawm Chin bible

SAM 115

¹LALPA, kanmah sin silo hen nangmah sin cho ah na dâwtnâk dawng lo leh na zumhkâinâk dawng lo ruangah rokualnâk pêk ding na si.

²Zeirangah phun tla nih “Zeiah na Pathian a umâ” hawng kan ti zia laiâ

³Kan Pathian chu vân ah a um, a duh mi zawng a ti.

⁴An pathian tla chu ngûn leh tangkasa minung kut hen siam mi an si.

⁵Kâ an nei, sikhawmsele an hawlh kho lo, mit an nei le, sikhawmsele an muh kho lo.

⁶Nâ tla an nei, sikhawmsele an theih kho lo, nâr tla an nei, sikhawmsele rim an theih lo.

⁷Kut tla an nei, sikhawmsele an tleih kho lo, kê an nei le, sikhawmsele an kal kho lo; rihâu an suah kho lo.

⁸Chubang zawzawng siamtu leh ngauhtu tla chu anmah siam mi milem hâwi hen um na seh.

⁹Nannih Israel mi tla, LALPA chu rinhsan u; a nan ṭangpi na hen a nan kilkâwi na asi.

¹⁰Nannih Pathian bâwlpu tla, LALPA chu rinhsan u. A nan ṭangpi na hen a nan kilkâwi na asi.

¹¹Amah sawnhtu zawzawng tla, LALPA chu ngauhsan u. A nan ṭangpi na hen a nan zauhkhenh na asi.

¹²LALPA nih hawng kan theihkumza hen mal hawng kan sâwm kumza lai. Israel mi tla zawzawng leh Pathian bâwlpu tla zawzawng chu mal a sâwm lai.

¹³Amah zahtu tla, a lian a mê hen mal a sâwm chiau na lai.

¹⁴LALPA nih nang leh na thlâk tla, fa an pêk na seh!

¹⁵Tual leh vân siamtu LALPA nih mal a nan sâwm seh!

¹⁶Vân lam chu LALPA tâ cho asi, tual lam chu minung rangah a pêk mi asi.

¹⁷A thi leh a vei rawh mi, veihnâk ram ah a kal rawh mi nih LALPA chu an sawr lo.

¹⁸Sikhawmsele, kannih, a nung mi nih chun tuah leh zeiliau zawngah a sinah lâwmthu kan sim lai. LALPA chu sawr u!