Read Bawm Chin SAM 118 Bible Online

SAM 118 - Bawm Chin bible

SAM 118

¹LALPA chu a ṭha ruangah leh a dâwtnâk chu zungzâl asi ruangah a sinah lâwmthu sim u.

²Israel mi tla nih chun, “A dâwtnâk chu zungzâl asi,” ti na seh.

³Pathian bâwlpu tla nih khawm, “A dâwtnâk chu zungzâl asi,” ti na seh.

⁴Amah sawnhtu zawzawng nih, “A dâwtnâk chu zungzâl asi,” ti na seh.

⁵Ka lawksawngnâk ah LALPA chu ka auh le, a ka sâng le, ruang hawng ka suah.

⁶LALPA ka sinah a um, ka lâu lai loh; Âu nih me an ka ti kho laiâ

⁷Hawng ka ṭangpitu chu LALPA asi, ka mêlma neh hen an um mi chu ka zauh na lai.

⁸LALPA lakah ngauh chu minung lakah ngauh ngâk hen a ṭha dauh.

⁹LALPA lakah ngauh chu minung ruitu tla lakah ngauh ngâk hen a ṭha dauh.

¹⁰Ka kiangkam ah mêlma tamtak an um le, sikhawmsele, LALPA thiltikhonâk hen ka veih dep na!

¹¹Ka kiangkam zawzawng ah an khat phak; sikhawmsele, LALPA thiltikhonâk hen ka veih dep na!

¹²Khual hâwi hen an ka tuam le, sikhawmsele ling zeikarlo ah mei nih a khangh hep hâwi hen khangh hep hen an um, LALPA chaknâk hen ka veih dep na.

¹³Ṭihnungkâi tak hen an ka do le, neh hen ka um, sikhawmsele LALPA nih hawng ka ṭangpi.

¹⁴LALPA nih thiltikho tak leh chak tak hen hawng ka siam le, ruang hawng ka suah.

¹⁵Pathian mi tla, puanin ah nehnâk ruangah lâwm hen an âu mi chu ngâi rawh. “LALPA chaknâk thiltikhonâk hen ti mi asi!

¹⁶A thiltikhonâk hen nehtu ah hawng kan siam, tuknâk khawmah a chaknâk thiltikhonâk hen!” ti hen.

¹⁷Ka thi lai lo, chu ngâk hen ka nung hen LALPA thilti ka phuang lai.

¹⁸Fâk tak hen hawng ka rêp le, sikhawmsele thih lam chu hawng ka thihtir lo.

¹⁹LALPA Biakin kulh kawtkâ, ka rangah a awng rawh, a sungah ka lût lai le, lâwmthu ka sim lai.

²⁰Hi hi LALPA inkulh kawtkâ mi rep tla cho lâtnâk asi.

²¹LALPA, ka thu na ka ngâi piak ruangah leh nehnâk na ka pêk ruangah ka nan sawr.

²²Lungin saktu nih mangtlâk lo hen an ruat le, an nawng mi chu a dang zawzawng ngâk hen a herh chem mi a hawng si.

²³Chu chu LALPA nih a ti mi asi; muh mi lakah chun a châ a!

²⁴Hi hi LALPA nehnâk ni chu asi; lâwptlo tak hen kan um lai le, kan ulh lai!

²⁵LALPA, ruang hawng kan suah rawh, ruang hawng kan suah rawh! LALPA, hawng kan dingchangtir!

²⁶LALPA min hen a hawng mi chu Pathian nih malsâwm seh! LALPA Biakin thawk hen mal kan sâwm.

²⁷LALPA chu Pathian asi, kan lakah a ṭha; nan kut hen thing ṭeng put ule, puai tuah dawmh ule, mâichâm hâl u.

²⁸Nang chu ka Pathian na si, lawmthu ka nan simh, na rokual zia ka phuang lai.

²⁹Lalpa chu a ṭha hen, a dâwtnâk chu zungzâl asi ruangah a sinah lâwmthu sim u.