Read Bawm Chin SAM 119 Bible Online

SAM 119 - Bawm Chin bible

SAM 119

¹A nungnâk sual tel lo mi chu an thaw a suak, LALPA dîn hâwi hen um mi chu.

²LALPA thupêk zûltu chu an thaw a suak e, an thinlung zawzawng hen amah ê-aw ngâitu tla chu.

³Thil diklo an ti dah lo, LALPA lampi ah an kal.

⁴LALPA, dân tla na kan pêk hen zumhkâi tak a zûl ding hen na kan simh.

⁵Na sîntirnâk zumhkâi tak kil ding hen ka lungum thlo!

⁶Na thupêk zawzawng ka ngâi chun, ka mualpho lai lo.

⁷Na lâirêl rep zia ka sîn chun thinlung thenhlimh hen ka nan sawr lai.

⁸Na dîn ka zâl lai, hawng ka kal tâk rîlmâl lah!

⁹Tlangvâl nih zeitin a nunchan a thenhlimhtir kho zia laiâ Na thupêk tla zâl hen.

¹⁰Ka thinlung zawzawng hen na rianṭuan ka tum; na dîn tla zûl kho ding hen hawng ka kil.

¹¹Na tlûnah thilsual ka ti lo ding hen ka thinlung ah na dîn ka kil lai.

¹²LALPA, ka nan sawr; na lampi hawng ka sîntir.

¹³Dân zawzawng na ka pêk mi chu fâkpi hen ka sim nawlh lai.

¹⁴Neih leh siah ngâk hen na dîn zâwt leikângah lâwmnâk ka nei dauh lai.

¹⁵Na sîntirnâk chu ka sîn le, na thusim tla chu ka zauhfiang.

¹⁶Na dîn thu tla ah ka lâwm le, na thupêk tla chu ka philh lai lo

¹⁷Kei, na to-aw lakah hin ṭhat suah le, churawhchun na sîntirnâk zâl hen ka nung khonâk ding hen.

¹⁸Na dîn thudik chê muh kho ding hen ka mit dei tir.

¹⁹Sâwtlotê hi tual ah hin ka um le; na dîn thu chu ka lakah thuh lah.

²⁰Ngâinâk hen ka thinlung a fâk; na lâirêlnâk chu zeiliau zawngah theih ka duh.

²¹Mi â zûm mi chu na simhfâi le, na dân thupêk zâllotu tla chu siatbarh hen an um.

²²Zauhnawmhtu tla leh siarlotu tla lakah mi hawng ka hum, na dân thu ka zâl ruangah.

²³Lâirêltu tla anna pûm le, an ka phiar le, sikhawmsele na sîntirnâk chu ka sân lai.

²⁴Na sîntirnâk nih hawng ka lawmhtir le; krai hawng ka pêktu asi.

²⁵Neh hen vâleidip ah ka tlâ thlo; na thutiam hâwi hen hawng ka chaktir nawlh.

²⁶Ka thilti zawzawng ka phuang le, nangnih na ka sâng; na lampi tla hawng ka simh.

²⁷Na dân thu tla theihthiam ding hen hawng ka ṭangpi le, chun, na sîntirnâk chê tla chu ka dawn lai.

²⁸Ngaihsiatnâk nih a ka neh thu na ka tiamh mi hâwi hen hawng ka chaktir.

²⁹Lam diklo ah kal lo ding hen hawng ka vêng le, na ṭhatnâk hen na dân thu hawng ka sîntir.

³⁰Ê-aw ngâi ka thîm le; na lâirêlnâk leikâng ah ka nâ ka thlâr.

³¹Lalpa na sîntirnâk ka zâl, ningzak hen hawng ka umtir lah.

³²Theihthiamnâk tam dauh na ka pêk awt ruangah lâwm tak hen na dân thu ka zûl lai.

³³LALPA, na dân thu umzia tla hawng ka sîntir le; zeiliau zawngah ka zûl kumza lai.

³⁴Na dân hawng ka simhfiang le, ka zûl lai le; ka thinlung zawzawng hen ka kil lai.

³⁵Na dân thupêk lakah lâwmnâk ka tawng ruangah ê-aw ngâi tak hen hawng ka siam.

³⁶Neihnâk ngâk hen na dân thu tla zûl duhnâk hawng ka pêk.

³⁷Thil do-tla-lo lakah pial lo ding hen hawng ka vêng le, Na thutiam hâwi hen ka lakah ṭhatnâk suah.

³⁸Na thu ngâitu tla sinah thu na tiamh na mi chu kil kho ding hen kei, na to-aw sinah hin hawng ka kiltir.

³⁹Donâk ka ṭih mi lakah hawng ka hum rawh, na lâirêl tla chu a châ a!

⁴⁰Na thupêk tla zâl ding ka duh le; na rep ruangah nungnâk thar hawng ka pêk.

⁴¹LALPA, na ka dâwtnâk fâk zia hawng ka muhtir le, na thutiam hâwi hen ruang hawng ka suah.

⁴²Na thu ka zumh ruangah hawng ka dotu tla chu ka sâng kho na lai rawh.

⁴³Na lâirêlnâk lakah lungumnâk ka nei ruangah, zeiliau zawngah thudik hawng ka simtir.

⁴⁴Zungzâl hen na dân thu chu ka zûl kumza lai.

⁴⁵Na sîntirnâk chu zûl ka tum ruangah thawsuaknâk rangtling hen ka um lai.

⁴⁶Lal tla sinah na thupêk tla chu ka phuang lai le, ka mualpho lai lo.

⁴⁷Na dân thu chu ka lawmh ruangah na thu ngâi hen lâwmnâk ka tawng.

⁴⁸Na thupêk tla chu ka zah hen ka duh le, na sîntirnâk chu ka dawn lai.

⁴⁹Na to-aw sinah thu na tiamh mi, lungum kâi tak hi theihkumza rawh.

⁵⁰Na thupêk nih nungnâk a ka pêk ruangah tuar liau khawmah ka thla a ngam.

⁵¹Mi zûm tla chu ka lakah nihsanhtu an si kumza, sikhawmsele na dân thu chu ka kaltâk lo.

⁵²LALPA, a lânah na lâirêlnâk chu ka theihkumza, lungiam an ka sak kumza.

⁵³Misual nih na dân an buar mi ka muh chun ka thin a thawk.

⁵⁴Tual ah ka dam kar zawngah na thupêk tla chu la hen ka phuak.

⁵⁵LALPA, zân ah ka nan theihkumza hen, na dân tla chu ka dawn.

⁵⁶Na thupêk tla zâlnâk ah lâwmnâk ka tawng.

⁵⁷LALPA, ka duh mi zawzawng chu nangmah na si, na dân zâl ding hen thu ka tiam.

⁵⁸Thu na tiamh hâwi hen, ka lakah khuaruat ding hen ka thinlung zawzawng hen ka nan ngiar.

⁵⁹Ka umdîn hi ka dawn le, na sîntirnâk zûl ding hen thu ka tiam.

⁶⁰Na thupêk tla zûl ding hen ka nam.

⁶¹Misual tla nih ka rangah thang an tunh le, sikhawmsele na dân chu ka philh lo.

⁶²Zânlâi ah ka ṭhang le, na lâirêl repnâk ruangah ka nan sawr.

⁶³Kei chu nangmah rianṭuantu zawzawng leh na dân thu zûltu zawzawng hâwikawmh ka si.

⁶⁴LALPA, tual hi na dâwtnâk dawng lo hen a khat; na thupêk tla hawng ka sîntir.

⁶⁵LALPA, na thutiam chu na kil le, kei na to-aw sinah ṭhat na suah.

⁶⁶Na thupêk ka zumh ruangah finghnâk leh theihthiamnâk hawng ka pêk.

⁶⁷Na ka rêp lânah, thil diklo leiah ka kal le, tu lam chun na thu ka ngâi.

⁶⁸Na ṭha hen vâl na nei a! Na thupêk tla hawng ka sîntir.

⁶⁹Mi zîm tla nih âwkrâwl hen ka thu an sim, sikhawmsele, ka thinlung zawzawng hen na sîntirnâk ka zûl.

⁷⁰Hi minung tla nih hin theihthiamnâk an nei lo, kei lam nih chun na dân thu ah lâwmnâk ka tawng.

⁷¹Râp hen ka um mi kei rangah chun a ṭha, na dân thu zûl ding hen lungfiang a ka suah ruangah.

⁷²Laikulh ah tangka zawzawng ngâk hen na dîn pêk chu ka rangah a ṭha dauh.

⁷³Na ka siam le, na ka hum; theihthiamnâk hawng ka pêk rawh, churawhchun na dîn ka theih kho lai.

⁷⁴Nangmah a nan zahtu tla nih an ka muh tikah na thutiam ka lung ruangah anna lâwm lai.

⁷⁵LALPA, na lâirêlnâk chu a rep ti ka theih le, zumh na kâi ruangah na ka rêp mi asi.

⁷⁶Na to-aw thu na tiamh hâwi hen na dâwtnâk dawng lo hen thla hawng ka ngamh.

⁷⁷Na dîn lakah lâwmnâk ka nei ruangah ka lakah khuaruat le, ka nung lai.

⁷⁸Mi zûm tla nih diklo tak hen an ka phiartu chu mualpho hen um seh, kei lam nih chun na sîntirnâk ka dawn lai.

⁷⁹Na dân thu theihtu zawzawng leh an zahtu chu ka sinah hawng na seh.

⁸⁰Na dân thu chu rangtling tak hen zûl ding leh chu hâwi ningzakkâi tak hen neh ka si lo ding hen hawng ka siam.

⁸¹LALPA, ruang na ka suah ding mi ngâk hen ka dî thlo; na thu ah chun zumhnâk ka nei.

⁸²“Zeitikah na ka ṭangpi awt?” ti hen ka nan deih liauah, na thutiam ngâk hen ka mit tla a dâ.

⁸³Uain dûr mang tlêk lo lawnh mi hâwi ka si. Sikhawmsele na dân thu lam chu ka philh lo.

⁸⁴Zei chan riamruam me ka ngâk awt? Hawng ka nehsawhtu tla zeitikah na rêp na awtâ

⁸⁵Na dân thu zûl duhlotu tla, mi zûm tla nih ka tlâknâk ding hen khur an chawh.

⁸⁶Na thupêk zawzawng tla chu zumh a kâi asi; mi tla nih nabeibâng hen an ka nehsawh, hawng ka ṭangpi rawh.

⁸⁷An hawng ka thah thlo dêngmâng, sikhawmsele na thupêk chu ka thlawrhthlâu lo.

⁸⁸Na dâwtnâk dawng lo chu ka lakah ṭha kumza seh, churawhchun na dân ka zûl lai.

⁸⁹LALPA, na thu chu zungzâl tiang a um lai le, vân khawmah san dawng lo asi.

⁹⁰Na zumhkâinâk chu kumleza hen a um; tual chu a mun ah na siah le, a um ziar.

⁹¹Na thupêk ruangah thil zawzawng tla chu tutiang hen a um le, nangmah to-aw tla hep an si ruangah.

⁹²Na dân thu hi ka lâwmnâk bul si lah sele chu, ka tuarnâk ruangah ka thi ving lai.

⁹³Na sîntirnâk chu ka thlawrhthlâu dah lo, chu lak chun nung dam hen na ka kil ruangah.

⁹⁴Na tâ ka si, ruang hawng ka suah! Na dân thu zûl ding hen ka ṭang.

⁹⁵Mi ṭhalo tla nih thah ding hen an ka bawh ko, sikhawmsele na dân thu tla ka dawn.

⁹⁶Thil zeizawng a dawng kho ti ka theih; sikhawmsele na thupêk tla a rangtling.

⁹⁷Na dân chu ka duh a! Nî tlêk dak hen ka dawn.

⁹⁸Na thupêk tla chu zeiliau zawngah ka sinah a um. Ka mêlma tla ngâk hen finghnâk an ka pêk.

⁹⁹Hawng ka sîntirtu zawzawng ngâk hen theihthiamnâk a ka pêk, na sîntirnâk chu ka dawn tâwn ruangah.

¹⁰⁰A tar mi ngâk hen finghnâk ka nei tam dauh, na thupêk tla ka zûl ruangah.

¹⁰¹Sual leikâng thinlung ka lawnh hep, na thu zûl ding ka duh ruangah.

¹⁰²Na sîntirnâk chu ka thlawrhthlâu lo; nangmah tak chu hawng ka sîntirtu na si ruangah.

¹⁰³Na sîntirnâk thâwtnâk chu a thlum ngâk a; khuaitizû ngâk hen a thlum dauh!

¹⁰⁴Na dân thu thawk hen finghnâk ka tawng, churuang chun umdân ṭhalo zawng chu ka hua.

¹⁰⁵Na thu chu hawng ka ruitu ding hen khâwnvâr asi. Ka lampi rangah chêu asi.

¹⁰⁶Ka thutiam chu na sîntirnâk rep zûl ding hen ka kil thlir lai.

¹⁰⁷LALPA, ka tuarnâk hi thungâi ṭihnung a kâi, thu na ka tiamh hâwi hen nung dam hen hawng ka kil rawh.

¹⁰⁸LALPA, lâwmthu sim hen ka thlachamnâk hi hawng ka pawm piak le, na thupêk tla hawng ka sîntir rawh.

¹⁰⁹Ka nungnâk râwk bawh hen a um le; na dân lam chu ka philh lo.

¹¹⁰Misual tla nih ka rangah thang an tunh le, sikhawmsele na dân thu zûl lo hen ka um lo.

¹¹¹Na thupêk tla chu ka zungzâl thilneih asi; ka thinlung lawmhtirtu tla an si.

¹¹²Ka thih tiang hen na dân tla chu zûl ding hen ka tiam.

¹¹³Na lakah zumhkâilo tla chu ka hua na. Sikhawmsele kei lam nih chun na dân ka duh.

¹¹⁴Nang chu hawng ka vêngtu leh humtu na si; na thutiam lakah lungumnâk ka nei.

¹¹⁵Nannih misual tla, ka sinah mi kal ving u, ka Pathian thupêk tla chu ka zûl awt.

¹¹⁶Na thutiam hâwi hen chaknâk hawng ka pêk le; ka nung lai, Ka lungumnâk lakah hin lungdawng hen hawng ka siam lah.

¹¹⁷Hawng ka deih le, ka him lai, chun na thupêk ka ngâi kumza lai.

¹¹⁸Na dân duhlotu tla zawng chu na hua na le, an perpet thiltum chu zeikhawm asi lo.

¹¹⁹Misual tla chu thil nâwmtâm hâwi hen na tuah na, churuang chun na sîntirnâk chu ka duh.

¹²⁰Nangmah ka nan ṭih; na lâirêlnâk ruangah lâunâk hen ka khat.

¹²¹Adik leh a ṭha mi chu ka ti le; ka mêlma lakah mi hawng ka kaltâk lah.

¹²²Na to-aw ṭangpi ding hen thu tiamh le, mi duhlei nih nâuneh leh zauhnawmh hen hawng ka umtir lah.

¹²³Na ṭangpinâk leh ruangsuah ding hen thu na ka tiamh mi ngâk hen ka mit tla a dÊ rawh.

¹²⁴Na zângfahnâk dawng lo hâwi hen ka lakah hawng ṭuan le, na thupêk tla hawng ka sîntir.

¹²⁵Na to-aw ka si, theihthiamnâk hawng ka pêk, na sîntirnâk ka theih kho ding hen.

¹²⁶LALPA, thil na ti ding a tik a tlung rawh, mi nih na dân thu an zûl duhlo ruangah.

¹²⁷Na thupêk tla chu ngûn ngâk hen ka duh dauh, ngûn a ṭha chem mi ngâk hen khawm ka duh dauh.

¹²⁸Churuang chun na sîntirnâk zawzawng chu ka zûl le, thil diklo leikâng zawzawng chu ka hua.

¹²⁹Na sîntirnâk chu a chê le, ka thinlung zawzawng hen ka zûl.

¹³⁰Na sîntirnâk simhfiangnâk nih chêu a pêk le, zeikhawm theih lo tla rangah finghnâk a pêk.

¹³¹Na thupêk tla ka duh mi chu ka kâ hen ka phuang.

¹³²Nangmah a nan duhtu tla zawzawng sinah na ti hâwi hen ka leiah hawng a her le, khuaruat rawh.

¹³³Thu na ka tiamh mi hâwi hen ka tlû ding mi hawng ka vêng; sualnâk nih neh ding hen hawng ka siang lah.

¹³⁴Na thupêk tla zûl kho ding hen hawng ka nâunehtu tla lakah mi hawng ka hum.

¹³⁵Na ka umpinâk hen mal hawng ka sâwm le, na dîn thu tla hawng ka sîntir.

¹³⁶Tî a luang mi hâwi hen ka mitthli a zut le, mi nih na dân an zûl duh lo ruangah.

¹³⁷LALPA, nang chu mi rêp na si le, na dân tla chu a dik.

¹³⁸Na dân na pêk mi tla chu a dik hen a ṭha.

¹³⁹Ka mêlma tla nih na dân an siarlo ruangah, mei hâwi hen ka thinthawknâk chu ka lakah a alh.

¹⁴⁰Na thutiam tla chu a fiang a! Ka duh chiam e!

¹⁴¹Kei chu mi herh ka si lo, zauhnawmh mi ka si. Sikhawmsele na sîntirnâk chu ka thlawrhthlâu lo.

¹⁴²Na repnâk chu san dawng lo asi, na dîn thu chu a dik kumza.

¹⁴³Nuamlonâk leh lawksawng hen ka khat, sikhawmsele na dân thu nih lâwmnâk hawng ka pêk.

¹⁴⁴Na sîntirnâk chu a dik kumza, theihthiamnâk hawng ka pêk le, ka nung lai.

¹⁴⁵Ka thinlung zawzawng hen ka nan auh; LALPA, hawng ka sâng rawh, chun na dân ka zâl lai!

¹⁴⁶Ka nan auh, ruang hawng ka suah, chun na dân ka zûl lai.

¹⁴⁷Nî suak lânah ṭangpi ka nan deih le, na thutiam lakah ka lungumnâk ka siah.

¹⁴⁸Zân khuavâr hen ka meng, na sîntirnâk tla dawn hen.

¹⁴⁹Na dâwtnâk dawng lo ruangah LALPA hawng ka ngâi, Na khuaruatnâk hawng langh le, ka nungnâk hum rawh!

¹⁵⁰Na dân zûl dahlotu minung hawng ka nehsawhtu sual tak tla nih an ka naih.

¹⁵¹Sikhawmsele, LALPA, ka kiangah nang chu na um le, na thupêk tla zawzawng chu a bir.

¹⁵²A lân thawk hen na sîntirnâk ka sîn le; zungzâl rang dingah na timhtuah mi asi.

¹⁵³Na dân thu ka thlawrhthlâu lo ruangah, ka tuarnâk tla hi zauh le, ruang hawng ka suah.

¹⁵⁴Râwknâk lakah mi hawng ka vêng hen hawng ka suah le, na thutiam hâwi hen ruang hawng ka suah.

¹⁵⁵Misual tla chu na dân thu an zûl duh lo ruangah ruangsuah hen an um lai lo.

¹⁵⁶Sikhawmsele, LALPA na zângfahnâk chu a rokual le; na khuaruatnâk chu langh le, ruang hawng ka suah rawh.

¹⁵⁷Nehsawhtu leh mêlma tla tamtak ka nei, sikhawmsele na dân thu zûl ka tlawlh lo.

¹⁵⁸Mi tleihtu tla chu ka zauh na chun ka fih na, na dân thupêk tla an zûl duh lo ruangah.

¹⁵⁹LALPA, zauhnik, na sîntirnâk chu ka duh a! Na dâwtnâk chu â dang dah lo, churuangah ruang hawng ka suah.

¹⁶⁰Na dân thu tla chu a dik le, na lâirêlnâk rep chu zungzâl asi.

¹⁶¹Mi thiltikho tak tla nih an ka do le, sikhawmsele na dân chu ka zah.

¹⁶²Na thutiam ruangah thungâi ka lâwm, mi nih neihnâk ting hen â lâwm mi hâwi ka si.

¹⁶³Âwkrâwl zawzawng chu ka fih hen ka hua le, na dân lam chu ka duh.

¹⁶⁴Nisiar hen na lâirêl repnâk ruangah vei sarih na sinah lâwmthu ka sim.

¹⁶⁵Na dân thu duhtu tla nih chun himnâk rangtling anna ting le, annih rangah tlûktir khotu zeikhawm a um lo.

¹⁶⁶LALPA, ruang na ka suah ding ka ngâk ko, thu na ka pêk mi tla chu ka ti.

¹⁶⁷Na sîntirnâk chu ka zûl, ka thinlung zawzawng hen ka duh.

¹⁶⁸Na sîntirnâk leh na thupêk tla chu ka zûl le, thil ka ti mi zawng chu na muh.

¹⁶⁹LALPA, ṭangpi ka nan ngiarnâk hi na sinah tleng seh. Na thutiam hâwi hen theihthiamnâk hawng ka pêk.

¹⁷⁰Ka thlachamnâk hi ngâi le, na thutiam hâwi hen ruang hawng ka suah.

¹⁷¹Na dân na ka sîntir ruangah ka nan sawr kumza lai.

¹⁷²Na dân thu tla a rep ruangah, na dân thu chu la hen ka sak lai.

¹⁷³Na thupêk tla ka zûl ruangah, hawng ka ṭangpi ding hen a tîm kumza.

¹⁷⁴LALPA! him ding hen na ṭangpinâk ka duh a! Na dân thu ah lâwmnâk ka tawng.

¹⁷⁵Ka nan sawr khonâk ding hen nungnâk hawng ka pêk; na sîntirnâk nih hawng ka ṭangpi seh.

¹⁷⁶Dawrâ tlâu hâwi hen ka vâi le, churuangah hawng le, hawng ka zauh, Na to-aw hi, na dân thu chu ka thlawrhthlâu lo ruangah.