Read Bawm Chin SAM 139 Bible Online

SAM 139 - Bawm Chin bible

SAM 139

¹LALPA, na ka nik le, na hawng ka theih rawh.

²Thil ka ti mi zawzawng na theih; ka dawnruatnâk zawzawng chu lât tak thawk hen na theih.

³Rian ka ṭuan mi leh ka dîn mi khawm na ka muh ko; ka thilti zawzawng na theih hep.

⁴Ka hawlh lân khawmah ka hawlh ding mi chu na theih ving rawh.

⁵Ka kiangkam zawzawng ah na um hep; na thiltikhonâk hen na ka hum.

⁶Na ka theih zia hi a thûk tuk, ka theihnâk lanh lei ving asi.

⁷Na sin thawk hen zeitin ka suak kho zia laiâ Na mâika mi zeitin ka tek kho laiâ

⁸Vân ah va kâi ving khawmsele chunah na um awt fâwn; laikulh a thi mi sinah va it awt khawmsele, chunah khawm na um awt.

⁹Saklei lanh ving zuang hen thlanglei ah a lât chemnâk ah um khawmsele,

¹⁰hawng ka rui ding leh hawng ka ṭangpi ding hen chunah na um lai.

¹¹Mûi sinah chun hawng ka thuh mawh, ka kiang ah chêu chu zân si rawh ti menza khawmsele,

¹²mûi chu na rangah a mûi lêm lo, zân khawm nang rangah chun sûn hâwi asi. Mâi leh chêu chu nang rangah chun â bang cho.

¹³Ka taksa tinpirit hi nangmah siam asi le, ka nu paw sungah munkhat hen na hawng ka pumh.

¹⁴Ṭih ding mi na si ruangah chun ka nan sawr, na thilti zawzawng tla chu â dang hen a chê asi. Ka thinlung zawzawng hen ka theih.

¹⁵Ka ruh tla hi na siam liauah, ka nu paw sungah a tlâi ver hen na siam. chunah chun âu theih loh hen ka ṭhang liauah, chunah ka um mi chu na ka theih le;

¹⁶ka suak lân khawmah na ka muh ving rawh. Zeikhawm dawmh asi lân khawmah ka damsung ni tla chu na lasuibu ah na singsiah hep rawh.

¹⁷Pathian, na dawnruatnâk hi theihthiam har ka ti a! Zei vial dek an si!

¹⁸Van rêl nik sele, sep ngâk hen an tam lai. Ka meng chun na sinah ka um ko.

¹⁹Pathian, mi ṭhalo tla chu thah le, ka duh â! Mi râwktu tla nih keimah lâwng hawng ka siah na sele ka duh a!

²⁰A ṭha lo leikâng hen an sim, na min nawmh hen an hawlh.

²¹LALPA, a nan huatu chu ka hua châwk a! Na lakah heltu chu ka zauhnawmh a!

²²Hua tatak hen ka hua na le; ka mêlma hen ka ruat na.

²³Pathian, hawng ka zauhfiang le, ka thinlung hi theih; Hawng ka nik le, ka dawn mi tla hi theih rawh.

²⁴Ka lakah sualnâk a um chun tawng ko hen hâwl le, zungzâl lampi ah hawng ka rui rawh.