Read Bawm Chin SAM 147 Bible Online

SAM 147 - Bawm Chin bible

SAM 147

¹LALPA chu sawr u! Pathian sawr hen la sak hi a ṭha asi. Amah sawr chu a dik hen a nuam.

²LALPA nih Jerusalem chu a dirh nawlh le, sal tâng tla chu a kîrtir nawlh na.

³Thinlung fâk tla chu a damh na hen, an mâ tla a tuam piak na.

⁴Ârfi tla chu an um zat ding a ruat le, pakhat khat hen an min a sak chiau na.

⁵Kan LALPA chu a chak hen a rokual le, a finghnâk chu tah kho asi lo.

⁶Â nâutir mi chu a chungnungtir le, sikhawmsele misual chu tual ah a nâutir na.

⁷LALPA sawr hen la sak u; kan Pathian sinah ṭingṭang tum u.

⁸Sâm tla chu chung vân leiah a zâr le, tual rangah ruah a ruat. Churawhchun tlêng mi belh tla chu a ṭhangtir.

⁹Ramsa tla rangah râwl a pêk na le, an kawh chun langâk fa tla a châwm na.

¹⁰A lâwmnâk chu rang chak tla lakah asi lo, kawrsen râlṭha tla lak khawmah â lâwm lo;

¹¹sikhawmsele, amah zahtu tla leh a dâwtnâk dawng lo ngauhsantu tla chu a lawmh na.

¹²Jerusalem, LALPA chu sawr rawh! Zion, na Pathian chu sawr rawh!

¹³Na kulh kawtkâ chu a chaktir le; na mi tla chu mal a sâwm na.

¹⁴Na ramri chu him tak hen a nan vêng piak le, buh ṭha chem hen a nan khimtir.

¹⁵Tual chu thu a pêk le, a sim mi chu a ti sawm vima.

¹⁶Kâwngbawl hâwi hen vûr chu a phah le, vûr a tlâ mi chu vâleidip hâwi hen a nektir.

¹⁷Rial chu lungteret hâwi hen a tlâ tir le, Daih a hawng tlungtir mi chu âukhawm nih an tuar kho lo.

¹⁸Churawhchun thu a hawng pêk le, vûr tlêng tla chu an zawr; thli a hawng rêngtir le, tî tla a luang.

¹⁹A mi tla sinah thu a chah na le; Israel tla sinah dîn a pêk mi leh a sîntir na mi chu.

²⁰Phundang tla rangah hi hi a ti mi asi lo, annih tla nih chubang a dîn tla khawm an theih loh. LALPA chu sawr u!