Read Bawm Chin SAM 30 Bible Online

SAM 30 - Bawm Chin bible

SAM 30

¹LALPA, ruang na ka suah ruangah leh ka mêlma tla diriamh lo ding hen na ka kil ruangah ka nan sawr.

²LALPA, ka Pathian, ṭangpi ding leh hawng ka damh ding hen kan auh;

³thlân ah ka kal ding mi na kan hum. A tanglei dawnghnâk ah ka um rawh mi chu ka nungnâk na zuah nawlh.

⁴A mi zumhkâi tla, LALPA chu sawr u! Mi thenhlimh nih ti mi thilti chu theihkumza ule, lâwmthu sim u.

⁵A thinrunhnâk chu sâwtlotê kar asi le, a ṭhatnâk chu damkar zawng rang asi. Zân ah chun mitthli luang khawmsele zânglei ah chun lâwmnâk a hawng tlung.

⁶Ka thinlung ah chun him ziar leh “Neh hen ka um rêng lai loh,” ka ti.

⁷LALPA, ka rangah na ṭha le, tlêng ah kulhpi hâwi hen na ka hum. Sikhawmsele ka lakah mi na thup chun ningṭih tak hen ka um.

⁸LALPA, ka nan auh, ṭangpi ka nan ngiar.

⁹“Ka thihnâk lakah hin zei me na ṭhatnâk a umâ Mithi tla nih nang an sawr kho mazeiâ Na ṭhatnâk khêl lo an sim kho mazeiâ

¹⁰LALPA, hawng ka ngâi le, ka lakah khuaruat! LALPA, hawng ka ṭangpi!”

¹¹Ka ngaihsiatnâk chu lâwm hen lâwmnâk ah na changtir; ka lawksawngnâk chu na lâk ving le, lâwmnâk hen na kulh.

¹²Churuangah ka dâisip awt lo; la sak hen ka nan sawr awt. LALPA, nang chu ka Pathian na si, lâwmthu ka nan simh kumza lai.