Read Bawm Chin SAM 37 Bible Online

SAM 37 - Bawm Chin bible

SAM 37

¹Misual ruangah na lawksawngtir lah; diklo tak hen thil titu khawm ngarh lah.

²Belh a châr mi hâwi hen an vei sawm lai le; thil phun mi tla a uai mi hâwi hen an thi lai.

³LALPA lakah a ngauh le, thil ṭha ti rawh; ram ah chun um le, him rawh.

⁴Na lâwmnâk chu LALPA sinah hâwl le, na thinlung duh chu an pêk lai.

⁵Nangmah kha LALPA sinah a pêk le; amah chu zumh le, a nan ṭangpi lai.

⁶Na repnâk, chu nî sunh chir liau hâwi hen a chêutir lai.

⁷LALPA thilti chu felfê tak hen ngâk le, Mi le sul-le-lam tluang ruangah na thasia lah le, Misual tla an thilsual tum lakah an dingchangnâk ruang khawmah.

⁸Neng lah le, na thinthawktir lah, Lawksawngnâk salam cho asi.

⁹LALPA lakah ngauhtu nih chun ram anna ting lai le, misual tla lam chu nar an si lai.

¹⁰Sâwtlotê ah misual chu a lang lai lo rawh; na zauh na lai le, khawmsele na muh na lai lo.

¹¹Mi â nautir mi nih ram chu anna ting lai le, vânṭhatnâk lawmh hen lungngam tak hen an um lai.

¹²Misual nih mi ṭha a phiar le, hua tak hen a zauh.

¹³LALPA nih misual chu a nihsanh lai le, sâwtlotê ah an vei awt ti a theih ruangah.

¹⁴Mipâm leh ṭangpi herh thah ding hen misual tla nih an nâmsâu an phâwi le, an chanhtiang an kâu. Thil dik titu tla thah ding hen khawm.

¹⁵Khawmsele, anmah nâmsâu lîlâ nih a thah na lai le, an chanhtiang chu khiak dip asi lai.

¹⁶Misual neih-le-siah zawzawng ngâk hen mi ṭha nih tâwmtê a nei mi a sung-û dauh.

¹⁷LALPA nih misual tla chaknâk chu a lawnh ving awt ruangah leh mi ṭha tla chu a hum na awt ruangah.

¹⁸LALPA nih amah ê-aw ngâitu tla chu a vêng le, ram chu an tâ asi kumza lai.

¹⁹Tik ṭhalo khawmah an tuar lai lo le, Pâm tik khawmah a tâwk an nei vima lai.

²⁰Misual tla lam chu an thi lai le, LALPA mêlma tla lam chu mâng chawmpâr hâwi hen an vei lai le, Meikhâ hâwi hen an tlâu lai.

²¹Misual nih a pûk le, a rulh loh, khawmsele mi ṭha chu tamtak a pêk.

²²LALPA nih mal a sâwm na mi nih chun ram chu an luah lai le; khawmsele siat a barh na mi chu nar phin an si lai.

²³LALPA nih mi chu a kalnâk ding lampi ah a ruai le, amah lawmhtirtu tla chu a hum na.

²⁴Tlû khawmsele, an tlû pawt lai loh, LALPA nih a ṭangpi na awt ruangah.

²⁵Tuhin ka tar rawh le, ka dam sawt ual rawh, khawmsele, mi ṭha LALPA nih a kaltâk mi leh an fa tla buh khawlh mi ka muh dah loh.

²⁶Zeiliau zawngah midang rangah a thawt hen a pêk hen a pêktir na le, a fa le khawm malsâwm hen an um.

²⁷Sual hawitâk le, thil ṭha ti rawh, na thlâk tla chu ram lakah an um kumza lai.

²⁸Pathian nih a dik mi chu a lawmh ruangah, a mi zumhkâi tla chu a kaltâk lo. A hum kumza na le, khawmsele misual thlâk tla chu a nar phin lai.

²⁹Mirep tla nih chun ram chu anna ting lai le, a sungah an um kumza lai.

³⁰Mi ṭha thu chu a ring hen a ṭha kumza.

³¹Pathian dîn chu a thinlungah a kil le, a kaltâk dah lo.

³²Mi sual nih mi ṭha a bawh le, thah ding a tum.

³³Sikhawmsele, LALPA nih a mêlma thiltikhonâk lakah mi chu a kaltâk lai lo le, nik hen a um liau khawmah a mawhtir lo.

³⁴LALPA lakah lungum le, a thupêk tla zûl rawh; ram an pêk mi hen thangṭhat an lawhtir lai, chun misual tla nar an si mi na muh lai.

³⁵Misual chu thunei tak hen Lebanon tlêng ah sidar thing hâwi hen mikip tlûnah sâng tak hen a um mi veikhat ka theih le;

³⁶sikhawmsele, chu nânah a kiangah ka va kal le, chu mun ah chun a um lo rawh; ka hâwl chîam le, khawmsele muh kho asi lo.

³⁷Mi ṭha chu zauh le, mirep chu singsiah rawh; Remnâk duhtu nih thlâk a nei,

³⁸khawmsele, misual chu an vei dep le, an thlâk tla khawm a vei dep.

³⁹LALPA nih mirep tla chu ruang a suah na le, lawksawng ni ah a hum na.

⁴⁰A ṭangpi na hen ruang a suah na; a sinah hum ding hen an kal ruangah misual lakah mi ruang a suah na.