Read Bawm Chin SAM 38 Bible Online

SAM 38 - Bawm Chin bible

SAM 38

¹LALPA, na thinrunnâk hen hawng ka rêp lah!

²Na thalzum hen na ka liamh le, lâwndep hen na ka vuak

³Na thinthawknâk ruangah fâk tak hen nganfâk ka tuar. Ka sual ruangah ka taksa pum hen a nganfâk.

⁴Sual tî lian lakah ka tlâ le; phurh ding hen an rit tuktarâi.

⁵Ka âtnâk ruangah ka mâ tla chu a thâ hen a mân.

⁶Ka kûn le, nganfâk hen ka um; nî tlâk hen ka tuar.

⁷Râi hawng ka fanh le, thungâi ka zual.

⁸Ka dâ hen ka râwk dep; ka thinlung a nawk le, nganfâk tuar hen ka râm.

⁹LALPA, ka duh mi chu na theih; ka rûm mi tla khawm na theih.

¹⁰Ka thinlung a tur le, ka chaknâk a vei. Ka mit nih khua chêu muhnâk a nei lo.

¹¹Ka mâ ruangah ka inpa leh ka hâwi tla khawm ka sinah an hawng lo; ka dâwngsung tla men nih an hawng ka kaltâk ving.

¹²Thah ding hawng ka duhtu tla nih ka rangah thang an tunh le, nganfâk pêk ding an ka duhtu tla nih chun râwk dep ding hen an ka rêl; an ka phiar mi an bâng lo.

¹³Kei chu nasêt zeikhawm theih lo hâwi ka si, mi a hawlh kho lo mi hâwi ka si.

¹⁴Mi a theih kho lo ruangah, a sâng kho lo mi hâwi ka si.

¹⁵Khawmsele, LALPA, nangmah kan zumh le, nang, LALPA, ka Pathian nih na ka sâng lai.

¹⁶Hamhnâk ka tawng mi lakah ka mêlma tla hawng ka diriamhtir lah le; ka tlû mi ruang hin a zîm lah na seh!

¹⁷Tlû ding hen ka um le, ka ngan a fâk kumza.

¹⁸Ka sual ka phuang le, ka lawk an ka sawngtir.

¹⁹Ka mêlma tla chu an ṭhisel hen an chak le; a san lo thlo hen an ka huatu chu tamtak an si.

²⁰Thil dik ti ka tum ruangah, thil ṭha thil sia hen an ka rulhtu tla nih an ka do.

²¹LALPA, hawng ka kaltâk lah le, ka Pathian, lât takah um lah.

²²LALPA, ka ruangsuahtu, tuah hawng ka ṭangpi!