Read Bawm Chin SAM 40 Bible Online

SAM 40 - Bawm Chin bible

SAM 40

¹Felfê tak hen LALPA ṭangpinâk chu ka ngâi le; ka âu mi a theih.

²Khur ṭihnungkâi lakah mi hawng ka thuak le, thihnâk dâp lakah mi chu lungpi tlûnah hawng ka siah le, him tak hen hawng ka siam.

³La thar, kan Pathian sawrnâk la chu hawng ka sîntir. Hi muhtu tamtak nih an ṭih lai le, LALPA chu an zumh lai.

⁴LALPA zumhtu tla, ruk leikâng hawi lotu, Pathian diklo sawnhtu tla lakah ṭângṭawm lotu chu an lâwptlo.

⁵LALPA, kan Pathian kan rangah thil tamtak na ti, nang hâwi chu âukhawm an um lo! Kan rangah thilchê tamtak na siam, an tamtuk ruangah ka sim châwk lo!

⁶Thil ap leh bâwlnâk na duh lo le; mâichâm tlûnah ran duah mawh sual veih ding hen bâwlnâk tla na ngiar lo; chu ngâk hen nangmah thu ngâi ding hen nâ na ka pêk.

⁷Churawhchun, “Hinah ka um; Dân bu lakah na sîntirnâk chu a um.

⁸Ka Pathian na duhzia thilti chu ka duh a! Na sîntirnâk chu ka thinlung ah ka kil,” ti hen ka sâng.

⁹LALPA, na mi le pumhnâk ah chun ruang na kan suah mi thâwngthâng ka sim. Chu thusim chu ka bâng rêng lai lo ti na theih.

¹⁰Ka ruangsuahnâk thu chu pheh lo hen na zumhkâinâk leh ṭangpinâk chu ka sim kumza. Na mi le pumhnâk ah chun na zângfahnâk leh zumhkâinâk thu sim lo hen ka um lo.

¹¹LALPA, ka lakah khua na ruatnâk hi a dawng lo ti ka theih. Na dâwtnâk leh zumh na kâinâk nih him tak hen hawng ka kil kumza lai.

¹²Nawknâk tamtak nih an ka tuam pang-rêlchâwk asi lo! Ka sualnâk nih a ka tleih le, ka muh kho lo rawh; ka lâ mi ka sam ngâk hen an tam,

¹³LALPA, hawng ka hum le, tuah hawng ka ṭangpi!

¹⁴Thah ding hawng ka awttu tla chu neh leh nawk hen um na seh. Ka lawksawngnâk ah lâwptlotu tla hi kâr leh ningzak tak hen um na seh.

¹⁵Hawng ka nihsanhtu tla chu neh leh zîmtir hen um seh.

¹⁶Na sinah hawngtu zawzawng tla chu lâwptlo hen a lâwm na seh. Na ruangsuahnâk lâwmhtu zawzawng nih, “LALPA chu a rokual a!” ti kumza na seh!

¹⁷LALPA, ka chak lo hen ka pâm, sikhawmsele na ka philh lo, nang chu ka Pathian, ka ruangsuahtu na si, hawng ka ṭangpi ding hen a nam rawh!