Read Bawm Chin SAM 41 Bible Online

SAM 41 - Bawm Chin bible

SAM 41

¹Mipâm lungkhamtu chu an lâwptlo; a lawksawng ni ah LALPA nih a ṭangpi na awt asi.

²LALPA nih a nungnâk chu a vêng hen a hum lai le, ram lakah lâwm tak hen a umtir lai le; an mêlma thiltikhonâk lakah mi chu a kaltâk na lai lo.

³An damlo ni ah LALPA nih a ṭangpi na lai le, ṭhiselnâk a pêk na lai.

⁴“LALPA, na lakah thilsual ka ti, ka tlûnah khuaruat le hawng ka damh,” ka ti.

⁵Ka mêlma tla nih ka thu ṭhalo hen an sim. Thi ding leh tlâu ving ding an ka duh.

⁶Ka sinah hawng kaltu tla nih chun siherhnâk an nei lo. Anna pûm le, ka thu a ṭhalo leikâng hen mun kipah an sim

⁷Hawng ka huatu tla chu keimah thu sim hen thuthup anna ruah le, Ka thu a ṭha lo leikâng karo an dawn.

⁸“Thi viviar hen a zaw le, a ihkhun ah mi a thawk kho lai lo rawh,” an ti.

⁹Ka hâwikawmh chem, ka zumh chem mi, buh munkhat hawng ka eipitu chu ka leido a hawng si.

¹⁰LALPA, ka lakah khuaruat le, hawng ka damh nawlh; ka mêlma tla lehrâl ka sam nawlh lai.

¹¹An hawng ka neh lo ruangah ka lakah na lâwm ti ka theih lai.

¹²Thil dik ka ti ruangah na ka ṭangpi lai le, na mâika ah chun na ka kil kumza lai.

¹³LALPA, Israel Pathian chu sawr u! Tuah leh zungzâl tiang hen amah chu sawr u! Amen! Amen!