Read Bawm Chin SAM 44 Bible Online

SAM 44 - Bawm Chin bible

SAM 44

¹Pathian, a lânah hawng kan thlâktu nih anmah san ah thil rokual tak tla na ti mi chu hawng kan simh le, kanmah nâ ngelchel hen kan theih rawh.

²Nangmah ngelchel nih lunglotu tla na nar hen, na mi le tla an ram na luahtir na zia leh Phun dang tla na rêp na le, na mi le tla sul-le-lam na tluangtir na mi chu.

³Na mi le tla nih ram chu an riamnâm hen an neh mi asi lo; anmah thiltikhonâk hen an neh mi khawm asi lo. Nangmah nih na umpi na mi an theih ruangah leh na thiltikhonâk leh na chaknâk ruangah asi. Chu nih chun na dâwt na ti a zauhtir.

⁴Nang chu ka Lal leh ka Pathian na si; na mi le tla chu nehnâk na pêk na,

⁵nangmah thiltikhonâk hen kan mêlma tla kan neh.

⁶Keimah hawng ka hum ding hen ka nâmsâu mawh ka chanhtiang ka rinhsanh loh;

⁷Ka mêlma lakah hawng ka humtu leh hawng ka huatu tla nehtu chu nangmah na si.

⁸Nang chu lâwmthusim hen ka nan sawr kumza lai.

⁹Sikhawmsele, na kan nawng le, neh hen na kan umtir rawh; kan kawrsen a kal mi tla sinah khawm na tel lo rawh.

¹⁰Kan mêlma lakah na kan tektir le, kan thil neih chu anmah rangah anna lâk.

¹¹Dawrâ thah ding mi hâwi hen na kan ruat le; ramdang ah na kan rektir ver.

¹²A man tâwmtê hen na mi tla chu na zuar na, man tâwmtê ding cho ah na ruat na hâwi hen.

¹³Kan zâwlbâwm tla nih na kan ti dîn an muh le, an kan tluktlak hen an kan nihsanh.

¹⁴Phun tla nih zauhnawmh ding hen na kan siam le, an lâ an lei le, hawng kan nihsanh.

¹⁵Ka mêlma leh hawng ka huatu tla nih an ka zauhnawmh

¹⁶leh an ka simsâwi mi ka theih le, ningzak hen ka khat.

¹⁷Na dîn thu buar lo hen kan philh lo khawmah, hi bang thil zawzawng tla hi kan lakah a hawng tlung rawh.

¹⁸Na lakah zumh kan kâi lo mi khawm asi lo; na thupêk kan âwi lo mi khawm asi lo.

¹⁹Khawmsele, ramsa nâwngah ṭangpitu neilo hen na kan mâk le, mâi sah tak lakah na kan mâk thlap.

²⁰Kan Pathian sawnh bâng hen, ramdang pathian sawnh khawmsele, thinlung dawnnâk thup theihtu na si ruangah na muh kho nget lai.

²²Nangmah ruangah zeiliau zawngah thah hen kan um, dawrâ thah ding mi hâwi hen ruat kan si.

²³LALPA! thawk, zeirang na it? Thawk! Nangmah tak thawk! Hawng kan nawng kumza lah!

²⁴Kan lakah mi zeirang na thup? Kan lawksawngnâk leh tuarnâk hi philh lah!

²⁵Tual ah kan tlû dep le; neh hen kan um le, valeidip ah kan rîl thlo.

²⁶Hawng kan ṭangpi ding hen thawk! Na dâwtnâk dawng lo nih ruang hawng kan suah ruangah!