Read Bawm Chin SAM 5 Bible Online

SAM 5 - Bawm Chin bible

SAM 5

¹LALPA, ka thu hi hawng ka ngâi piak le, ka rûm mi hi theih rawh.

²Ka lal leh ka Pathian, ṭangpi ding hen ka nan auhnâk hi hawng ngâi. LALPA na sinah ka nan ngiar.

³Zîng ah chun ka hâu na theih le, nî suak ah na sinah thla ka cham le, na sângnâk ka ngâk.

⁴Thilsual titu lakah a lâwm mi Pathian na si lo le; na mâika ah sualnâk um na sâithiam lo.

⁵Mi â zîm mi mitmuh ah na dîr kho lo le; misual tla chu na hua na.

⁶Mi âwkrâwl tla chu na veih na le, mi perpê leh râwktu tla chu na zauhnawmh na.

⁷Sikhawmsele, na dâwtnâk rokual ruangah na in ah ka hawng kho. Na Biakin thenhlimh ah ka nan sawnh kho hen, zah tak hen na sinah ka hawng kûn.

⁸LALPA, mêlma tamtak ka nei! Na duhzia ti ding hen hawng ka rui le; chun, na lampi chu ka zawh kho ding hen tluang tak hen hawng ka siam piak.

⁹Ka mêlma thusim chu zumh kho mi asi lo; râwk ding karo an ka duh. An aw-kâ chu a thlum hen a tlawr. Sikhawmsele thihnâk rê hen perpetnâk asi.

¹⁰Pathian, mawhtir na hen rêp na le, An ruatnâk diklo chu anmah râwknâk si seh. An sual ruangah leh na lakah an hel ruangah na mâika ah mi chu nar ving na.

¹¹Sikhawmsele, nangmah lakah himnâk tawngtu tla chu anna lâwm lai le, lâwm hen la an sak kumza lai. Nangmah dâwttu tla chu kilkâwi na le, nangmah ruangah lâwm tatak hen anna lâwm ruangah.

¹²LALPA, nangmah ê-aw ngâitu chu mal na sâwm na le; Na dâwtnâk nih phaw hâwi hen na hum na.