Read Bawm Chin SAM 50 Bible Online

SAM 50 - Bawm Chin bible

SAM 50

¹LALPA, Pathian zeizawng tikho nih saklei, thlanglei laikulh zawzawng ah mi a kawh na le, thu a sim:

²Zion khuapi rangtling leh dawh thawk hen Pathian chêu nih a cherh.

³Kan Pathian chu dâisip hen a hawng lo; thinthawknâk mei chu a mâi ah a um, thlipi ṭihnungkâi chu a kiangkam ah a um.

⁴A mi le tla lâi a rêl mi chu muhtu ding hen tual leh vân a kawh.

⁵“Ka mi zumhkâi tla, thutiamnâk nei hen bâwlnâk hawng aptu tla chu ka sinah hawng pumh na,” a ti.

⁶Pathian chu mirep asi zia vân nih a phuang.

⁷“Ka mi tla, ngâi u, thu ka sim awt; Israel, kei Pathian, nan Pathian, Keimah kalh hen nan um mi thu kan theihtir na awt.

⁸Bâwlnâk leh thil duah nan hawng ap kumza mi ruangah kan simhfâi na mi asi loh.

⁹Nan phâisen ah mi chawchal leh ranrual lakah mi kâl chu ka herh lo;

¹⁰thing mun ah ramsâ tla zawzawng leh tlêng sâng tla tlûnah mi ran tla khawm ka tâ asi.

¹¹Mâng ah mi va tla zawzawng leh phâi ah mi Thilnung tla khawm ka tâ asi.

¹²“Ka sungvêng khawmsele ka nan simh ding asi lo, laikulh ah thil zawzawng hi ka tâ a si ruangah.

¹³Chawchal sa tla leh kâl thâ ka din mazeiâ

¹⁴Na lâwmthusimnâk chu Pathian sinah na bâwlnâk si sele, Zeizawng Tikho sinah thilpêk na tiamh mi chu pêk rawh.

¹⁵Na lawksawngnâk ni ah hawng ka auh le, ruang ka nan suah lai, nangnih ka thang na ṭhattir lai.

¹⁶Sikhawmsele, Pathian nih misual sinah, “Zeirangah ka dîn leh ka thupêk tla na simâ

¹⁷A nan diktir ding hen na ka duh lo le. ka thupêk khawm na duh lo.

¹⁸Mifâr na muh chun na bawp le, ṭangdang pawmtu tla umzia na châwng.

¹⁹“Thil sual sim ding na tum kumza, âwkrâwl thusim lak khawm na sêm lo.

²⁰Na unaupa chu a mawhnâk na hâwl hen phiar ding na awt kumza.

²¹Hi zawzawng thil na ti khawmah zei thu khawm ka sim lo, churuang chun nangmah hen bang cho na ka ruat. Churuang chun tuah nunsimh hen thu ka nan simhfiang lai.

²²“Nang, mi lungkhung, hi hi ngâi; chu lo chun ka nan veih awt, âukhawm a nan humtu ding a um lai loh.

²³Hawng ka zahtu nih lâwmthu an sim mi chu bâwlnâk asi; ka thu ngâitu zawzawng chu ka hum ngelchel lai.”