Read Bawm Chin SAM 56 Bible Online

SAM 56 - Bawm Chin bible

SAM 56

¹Pathian, tuknâk ah ka um ruangah ka lakah khuaruat le; ka mêlma tla nih zeiliau zawngah an ka nehsawh.

²Nî tlêk hen ka mêlma tla nih an ka do. Hawng ka dotu tla chu tamtak an si.

³Zeizawng tikho LALPA, ka ningṭih liau chun nangmah lakah ka ngauh.

⁴Pathian lakah ka ngauh le, ka ningṭih lo, A thutiam ruangah ka sawr. Minung salam nih zei a ka ti kho laiâ

⁵Nî tlâk hen ka mêlma tla nih ka lawk an sawngtir le, nganfâk pêk ding karo an ka tum.

⁶Mi muhlonâk ah anna pâm le, thil ka ti mi kipah thah ding duh hen an ka bawh.

⁷Pathian, hi minung tla hi na thinthawknâk hen rêp na le, neh na.

⁸Ka lawksawng zia chu na theih; ka mitthli tlêk singsiahnâk chu na kil le, na lasuibu ah rîn an silo ma?

⁹Ka nan kawh ni ah chun, ka mêlma tla chu an kîr hep lai.

¹⁰LALPA a thutiam ka sawr mi chu ka kiangah Pathian a um ti ka theih.

¹¹Pathian lakah ka ngauh le, ka lâu rerêng lai lo. Minung salam nih zei an ka ti kho lai.

¹²Pathian, thu kan tiamh mi hâwi hen kan pêk lai;

¹³thihnâk ah mi ruang na ka suah ruangah leh neh hen ka um ding mi na ka hum ruangah lâwmnâk ka nan ap lai. Churuangah a nung mi cherhtu Pathian mâika ah ka kal.