Read Bawm Chin SAM 65 Bible Online

SAM 65 - Bawm Chin bible

SAM 65

¹Pathian, Zion ah nangmah sawr chu a dik asi.

²Thlachamnâk na sâng ruangah kan thutiam chu na sinah kil.

³Mun kipah mi tla an sual ruangah na sinah an hawng lai. Kan sualnâk nih hawng kan neh le, sikhawmsele nangmah nih na kan ngaihdam.

⁴Nangnih na thîm na mi tla, na mun thenhlimh ah um ding hen na hawngpi na mi chu an lâwptlo. Na in ah mi thil ṭha leh na Biakin thenhlimh ah malsâwmnâk hen kan khim lai.

⁵Nehnâk pêk hen na kan sâng le, ruang hawng kan suah ding hen thilchê na ti. Laikulh mi zawzawng leh tipi varâl lei mi nih an lung.

⁶Na chaknâk hen tlêng tla chu a mun ah na siah na le, na thilti rokual zia na langhtir.

⁷Tipi tla rihâu chu na bângtir le, a tlingtlawk mi rihâu tla leh zapi rihâu tla khawm na bângtir.

⁸Thil rokual tak na ti mi ruangah laikulh pumpi chu a lâu. Na thilti nih tual khatlei dawnghnâk thawk hen khatlei dawngh tiang lâwm hen a âutir.

⁹Ruah na sûrtir mi nih ram na kilkâwi zia a langhtir le; neih tirnâk leh ṭhattirnâk na pêk. Tiva tla chu tî hen na khattir le; tual tla chu rah na suahtir. Na ti dân chu hi hi asi:

¹⁰Phâisen nâwn mi lakah ruah tamtak na sûrtir le, tî hen na chiah na; ruah tî hen tual tla na nêmtir le, thlâi keuh tla na ṭhangtir.

¹¹Na ṭhatnâk nih fângzûn liauah neihnâk na pêk! Na kalnâk zawng chu a tam vima.

¹²Ram ningno chu ranrual hen na khattir; tlêng tla chu lâwm hen an khat.

¹³Phâi tla chu dawrâ hen an khat; tiva hum tla chu fâng hen an khat, thil zeizawng anna lâwm le, la an sak.