Read Bawm Chin SAM 66 Bible Online

SAM 66 - Bawm Chin bible

SAM 66

¹Nannih mi zawzawng tla, lâwmnâk aw-hâu hen Pathian sawr u.

²A min rokual chu sawr ule; chawnglawmhnâk rokual chu pêk u!

³“Thil na ti mi tla chu an chê a! Na thiltikhonâk chu a rokual ngâk! Na mêlma tla chu lâu hen na mâika ah an kân.

⁴Tual tlûn mikip nih a nan sawnh; la sak hen a nan sawr, la sak hen na min an sawr,” Pathian sinah ti u.

⁵Pathian nih minung fa tla tlûnah a thilchê ti tla, hawng le, zauh.

⁶Tipi tla chu tual châr ah a siam le, hawng kan thlâktu tla nih tiva chu kâ hen an tan. chunah a thilti ruang chun kanna lâwm.

⁷A thiltikhonâk hen zungzâl lâi a rêl le; phun tla chu a zauh kumza na. âukhawm a lakah an hel lo.

⁸Phun zawzawng tla, kan Pathian chu sawr u; nan sawrnâk chu theih hen um seh.

⁹Nung dam hen hawng kan zuah le, tlâ ding hawng kan siang lo.

¹⁰Pathian, nik ding hen na kan siah le; vmei hen tangkasa an êr mi hâwi hen na kan nik.

¹¹Thang lakah na kan awhtir le, kan kêng ah thilrit na siah.

¹²Ka mêlma na kan lamhbêktir le; mei leh tîlian lakah kan lan, tuah lam chun himnâk ah na kan siah rawh.

¹³Na in ah duah mi bâwlnâk ka hawng put lai le, ka tiam mi hâwi hen ka nan pêk lai.

¹⁴Ka lawksawng liauah ka ti lai, ka ti mi hâwi hen ka nan pêk awt.

¹⁵Mâichâm tlûnah duah ding dawrâ chu ka hawng ap lai le, chawchal leh kâl hen ka bâwl lai, a khâ chu vân leiah a kâi lai.

¹⁶Pathian zahtu zawzawng tla, hawng ule, ngâi u, ka rangah thil a ti mi chu ka nan simh na lai.

¹⁷Ṭangpi ding hen ka auh le, la hen amah ka sawr.

¹⁸Ka sual ka theihtir lo chun LALPA nih hawng ka ngâi piak lai lo.

¹⁹Sikhawmsele, Pathian nih chun a ka theih tatak le; ka thlachamnâk a ngâi.

²⁰Pathian nih ka thlachamnâk a nawng lo ruangah leh a dâwtnâk dawng lo a chattir lo ruangah amah chu ka sawr lai.