Read Bawm Chin SAM 69 Bible Online

SAM 69 - Bawm Chin bible

SAM 69

¹Pathian, ruang hawng ka suah! Tî nih ka ngâwng tiang hawng ka nâm.

²Nêngthû thûk tak ah ka pil, tual chang rerêng a um lo; tî thûk tak leh tî tlingtlawk lakah ka tlâ awt mi chu ka suak.

³Ṭangpi deih hen âunâk ah ka dâ thlo, ka rawm tla a fâk ver. Nangmah ṭangpi ding hâwl hen ka mit tla a hivâi ver.

⁴A san lo hen hawng ka huatu tla chu ka lû mi sam ngâk hen an tam. Ka mêlma tla nih keimah do hen âwkrâwl thu an sim le, an chak le, thah ding an ka awt. Ka fâr lo mi thil an ka khirh.

⁵Pathian, ka sual tla hi nang sinah chun thuh asi lo; ka ât zia tla chu na theih.

⁶Chungnungchem LALPA zeizawng tikho! Nangmah a nan zumhtu tla lakah mualpho hen hawng ka umtir lah. Israel Pathian! nangmah a nan sawnhtu tla lakah ningzak hawng ka saih lah.

⁷Zauhnawmh leh ningzak saih hen ka um mi chu nangmah ruangah asi.

⁸Ka unau tla sinah chun khual hâwi ka si le; ka dâwngsung tla sinah chun ramdang mi hâwi ka si.

⁹Na Biakin ah ka pumpêknâk nih chun mei hâwi hen hawng ka khangh. Nangmah lakah simsiatnâk chu ka lakah a hawng.

¹⁰Kei chu buh ngei hen ka nâutir le, mi tla nih an ka zauhnawmh.

¹¹Ulhnâk puan hen ka thuam le, an hawng ka nihsanh.

¹²Khualâi tlêng ah keimah thu karo an sim, Zurî mi tla nih la hen an ka suangkhâng.

¹³Kei lam chu LALPA, na sinah thla ka hawng cham lai. Pathian na tik na ruat mi lakah hawng ka sâng. Ruangsuah ding hen thu na tiamh ruangah na dâwtnâk rokual ruangah hawng ka sâng.

¹⁴Nâng lakah ka pil ding mi chu ruang hawng ka suah le; tî thûk tak leh ka mêlma tla lakah mi chu hawng ka hum le, hawng ka kil.

¹⁵Tîlian ka lakah hawng tlungtir lah; Tî thûknâk ah tlâ ding leh thlân khur sungah lût ding hawng ka siang lah.

¹⁶LALPA, na dâwtnâk dawng lo leh na ṭhatnâk ruangah hawng ka sâng le, na vêlneihnâk rokual ruangah keimah lei hawng a hawi!

¹⁷Na to-aw lakah hin a thup lah le; lawksawngnâk fâk tak ah ka um, tuah hawng ka sâng!

¹⁸Ka sinah hawng le, ka mêlma lakah mi ruang hawng ka suah le, hawng ka hum.

¹⁹Ka mêlma tla nih ningzak an ka saih mi leh zauhnawmh ka si zia na theih hen na muh.

²⁰Simsâwinâk nih ka thinlung a râwk le, ka lung a dawng. Zângfahtu leh siherhtu ka lungum le, sikhawmsele pakhat khawm an um lo. Thlangamhtu ka hâwl le, âukhawm ka tawng lo.

²¹Ka sung a vêng liauah tûr an ka pêk; ka tîhâl liauah uain thur an ka pêk.

²²An puai nih anmah râwk na seh; a thup hen an puai tuah nih chun anmah niamhtir na seh.

²³An mit chawtir na, an kêng tla chaklotir kumza na!

²⁴An lakah na thinthawknâk suah le, na thinrunnâk hen neh na.

²⁵An umnâk chu a karo hen mâk na seh; an puanin ah chun pakhat khawm nung hen a mâk lah na seh.

²⁶Na rêp na mi chu an nehsawh na; na liamh na mi tuarnâk thu chu an sim.

²⁷An sual zawzawng singsiahnâk bu chu kil le, na ruangsuahnâk lakah chun tingvo zeikhawm neitir lah na.

²⁸Nungnâk bu ah mi an min chu râwk hen um seh, na mi le rînnâk bu ah telh an silonâk ding hen.

²⁹Sikhawmsele, kei lam chu nganfâk leh lungdawng hen ka um; Pathian, hawng ka châwi le, ruang hawng ka suah!

³⁰Pathian chu la hen ka sawr lai le, a rokualnâk chu lâwmthu sim hen ka phuang lai.

³¹Hi nih hin chawchal a ṭhang zawh mi leh ranrual mang hen a sinah bâwlnâk ngâk hen LALPA chu a lawmhtir lai.

³²Nâuneh an si mi tla nih an muh tikah anna lâwm lai le; Pathian sawnhtu tla khawm fawrh hen an um lai.

³³LALPA nih ṭangpi herh leh rêngin mi tla chu philh lo hen a ngâi na.

³⁴Tual leh vân tla, Pathian chu sawr u. Tipi leh a sungah um zawzawng tla nih khawm sawr u.

³⁵Jerusalem chu a hum lai le, Juda khuapi tla chu a sak nawlh lai. A mi tla chu chunah an um lai le, ram chu anna ting lai.

³⁶A to-aw thlâk tla nih chun an luah lai le, amah dâwttu tla chu chunah an um lai.