Read Bawm Chin SAM 71 Bible Online

SAM 71 - Bawm Chin bible

SAM 71

¹LALPA, hawng ka hum ding hen na sinah ka hawng; neh hen hawng ka umtir rîlmâl lah!

²Mirep na si ruangah hawng ka ṭangpi le, ruang hawng ka suah. Hawng ka ngâi le, ruang hawng ka suah.

³Thlangam tak hen ka dawrnâk leh hawng ka hum ding hen ka kulhpi bir tak si rawh. Nang chu ka kulh leh hawng ka vêngtu na si.

⁴Ka Pathian, mi ṭhalo tla leh mi rualo leh misual tla thiltikhonâk lakah mi ruang hawng ka suah.

⁵LALPA, ka ngâksiatê thawk hen ka lungumnâk ka siah hen ka nan ngauhsan.

⁶Ka damsung zawzawng na lakah ka ngauh le, ka suak ni thawk hen nangnih hawng ka hum. Ka nan sawr kumza lai.

⁷Hawng ka vêngtu chak tak na si ruangah ka nungnâk hi mi tamtak rangah zânzauh ding hen a um.

⁸Nâ tlêk tlêk hen ka nan sawr hen na rokualnâk ka phuang.

⁹Tuah ka tar mi hi hawng ka nawng lah. tuah ka chak lo mi hi hawng ka kaltâk lah.

¹⁰Ka mêlma tla nih thah ding an ka tum le, thu anna ruah le, an ka phiar.

¹¹“Pathian nih a kaltâk rawh; a dunglei ah kan ṭhâwl lai le, kan tleih lai, amah sanhtu ding âukhawm an um lo,” an ti.

¹²Pathian, ka sinah mi lât takah um lah. Ka Pathian, hawng ka ṭangpi ding hen a nam.

¹³Hawng ka dotu tla chu neh leh râwk hen um na seh. Nganfâk pêk ding hawng ka tumtu tla chu mualpho leh ningzak hen um na seh.

¹⁴Ka lungumnâk chu na sinah ka siah kumza lai le, ka nan sawr dadauh lai.

¹⁵Na ṭhatnâk thu ka sim lai le, ka theih kho mi ngâk hen tam khawmsele, nâ tlêk hen na ruangsuahnâk thu ka sim lai.

¹⁶LALPA, Pathian, na thiltikhonâk chu ka sawr lai le; nangmah ṭhatnâk ka phuang lai, nangmah tâ cho.

¹⁷Ka ngâksia liau thawk hen na hawng ka sîntir le, na thilchê ti tla chu ka sim nget rih.

¹⁸Pathian, tu chun ka tar rawh le, ka sam tla a pâr rawh; Hawng ka kaltâk râlmâl lah. Thlâk hawng um ding mi zawzawng sinah na thiltikhonâk leh chaknâk ka sim liau hin ka sinah um kumza.

¹⁹Pathian, na repnâk nih vân a dîng. Thil rokual tak tla na ti le, nangmah hâwi âukhawm an um lo.

²⁰Ka tlûnah tuarnâk leh nawknâk na hawng tlungtir le, sikhawmsele, chaknâk na ka pêk lai le, thlân lakah mi chu na ka hum lai.

²¹A lân ngâk hen lian dauh hen na ka siam lai le; thla na ka ngamh lai.

²²Ṭingṭang hen ka nan sawr lai le, ka Pathian, na zumhkâinâk ka sawr lai. Nang Israel Mi Thenhlimh, ka ṭingṭang tum hen na sinah la ka sak lai.

²³Na rangah ṭingṭang ka tum liau chun lâwm hen ka âu lai le; ruang na ka suah ruangah ka thinlung zawzawng hen la ka sak lai.

²⁴Keimah nganfâk pêk ding hawng ka tumtu tla chu neh leh ningzak saih hen an um ruangah nî tlâk hen na repnâk thu ka sim lai.