Read Bawm Chin SAM 83 Bible Online

SAM 83 - Bawm Chin bible

SAM 83

¹Pathian, hawlh lo hen um lah; châng lo hen um lah, dâisip lah!

²Zauhnik! na mêlma tla an thawk le, a nan huatu tla an hel.

³Na mi le tla tlûnah thil thup ti an tum le; na kilkâwi na mi chu phiar an tum na.

⁴“Hawng u, an phun tla hi kan veih dep na lai le, Israel chu kumleza hen theih asi lai lo rawh,” an ti.

⁵Nangmah do ding hen murui an siam!

⁶Chubang tla chu Edom, Ismael tla; Moab leh Hagrit,

⁷Gebal, Amon, Amalek, Philistia leh Tura tla an si.

⁸Lot thlâk Asiria khawm murui chak tak si ding hen an bawp na.

⁹Kison Va ah Midian mi tla Sisera leh Jabin tlûnah na ti hâwitâ hen ti na.

¹⁰Endor ah na neh na le, an ruak tla tual ah a thû hep.

¹¹An ruitu le tla chu Orep leh Zeep tlûnah na ti mi hâwi hen ti na; Zebah leh Zalmuna lakah na ti hâwi hen an lâirêltu tla chu neh na.

¹²“Pathian tâ chu kanmah tâ si ding hen kan lâk lai,” titu tla chu.

¹³Pathian, valeidip hâwi hen zuangtir phin na le, fapawn thli nih a ranh phin mi hâwi hen.

¹⁴Thingmun a kâng mi hâwi leh tlêng mei nih a khangh mi hâwi hen,

¹⁵na thlipi hen nunsimh na le, na thli ṭihnungkâi hen lauh na.

¹⁶LALPA, an mâl chu ningzak hen khattir le, na thiltikhonâk chu theihtir nawlh na.

¹⁷Neh leh lâu hen um na sele; ningzakkâi tak hen thi na seh.

¹⁸Nangmah cho chu LALPA leh tual ah lâirêltu lian na si ti an theihnâk ding hen.