Read Bawm Chin SAM 84 Bible Online

SAM 84 - Bawm Chin bible

SAM 84

¹Zeizawng tikho Pathian, na Biakin ka ngâi a!

²Chunah um chu ka duh a! LALPA Biakin ah um ka ngâi. Pathian nung sinah ka pumpiluk hen la ka sak.

³Kâwlrît nih bû a khuar hâwi leh pêlêp khawm nih mah in an nei. na mâichâm kiangah an fa tla an khurhâwm na asi. LALPA zeizawng tikho, ka lal leh ka Pathian.

⁴Na Biakin ah um mi tla chu anna lâwm a! Nangmah sawr hen la an sak kumza.

⁵Nangmah thawk hen chaknâk tawngtu tla chu an thaw a suak a! Zion Tlâng ah tlawng ding duhtu tla chu an thaw a suak.

⁶Baka kuam an kal liauah tinungva umnâk asi; ruah târ tla nih tili tla an khah.

⁷An kal liau chun an chak dadauh le, Pathian tla Pathian chu Zion ah an muh lai.

⁸LALPA Pathian, Zeizawng tikho, ka thlachamnâk theih rawh. Jakob Pathian! ngâi rawh.

⁹Pathian, na thîm mi kan lal chu malsâwm rawh.

¹⁰Na Biakin ah ni khat mang hi mun dangah ni sângkhat mang ngâk hen a ṭha dauh. Mi ṭhalo in ah um ngâk hen ka Pathian in kawtkâ ah ka dîr dauh lai.

¹¹LALPA chu hawng kan vêngtu leh lal rokual asi, zahnâk leh vêlneihnâk hen mal hawng kan sâwm. Thil dik titu tla rangah zeikhawm thil ṭha sianglo a nei lo.

¹²Zeizawng tikho Pathian, nangmah an ngauhsantu tla chu anna lâwm ngâk a!