Read Bawm Chin SAM 86 Bible Online

SAM 86 - Bawm Chin bible

SAM 86

¹LALPA, ṭangpi herh leh chaklo ka si ruangah, hawng ka ngâi le, hawng ka sâng rawh.

²Na lakah ê-aw ka ngâi ruangah thihnâk ah mi hawng ka hum le; na to-aw, nangmah lungtu ka si, ruang hawng ka suah.

³Nang ka Pathian na si, churuang chun ka lakah khuaruat le; nî tlêk hen na sinah thla ka hawng cham.

⁴LALPA, na sinah ka thlachamnâk a hawng tlung rawh ruangah na to-aw hi lawmhtir rawh.

⁵Nang chu kan lakah na ṭha hen na kan ngaihdam, na sinah thlachamtu chu dâwtnâk dawng lo na pêk.

⁶LALPA, ka thlachamnâk hi ngâi le; ṭangpi deih hen ka âu mi hi theih rawh.

⁷Ka thlachamnâk na ka sâng ruangah lawksawng ni ah ka nan auh.

⁸LALPA, nang hâwi hi zei Pathian khawm a um lo; Thil na ti mi hâwi titu pakhat khawm an um lo.

⁹Phun zawzawng na siam na mi chu an hawng lai le, na sinah kûn hen na rokualnâk an sawr lai.

¹⁰Nang chu na chak le, thilchê tak tla na ti; nang cho hi Pathian na si.

¹¹LALPA, zei ti ding hen na ka duh, hawng ka sîntir le, zumhkâi tak hen na thu ka ngâi lai. Na rangah pumpêknâk nei hen na rianṭuan ding hen hawng ka sîntir.

¹²LALPA ka Pathian, ka thinlung zawzawng hen ka nan sawr lai; na rokual zia chu ka phuang kumza lai.

¹³Ka rangah na dâwtnâk dawng lo chu a rokual a! Thlân lakah mi ngelchel chu ruang na ka suah.

¹⁴Pathian, mizûm tla nih an ka do; misual murui tla nih thah ding an ka awt, nangmah lei an nâ thlîr duhlotu tla chu.

¹⁵Sikhawmsele, LALPA nang lam chu, khuaruat mang leh dâwttu Pathian na si; dawnh kho kumza leh vâlnei leh zumhkâi na si.

¹⁶Ka nu nih a ti mi hâwitê hen na rian ka ṭuan ruangah ka leiah hawng a her le khuaruat; hawng ka chaktir le ruang hawng ka suah.

¹⁷LALPA, na ṭhatnâk fiang tak hen hawng ka muhtir le; hawng ka huatu tla nih thlangamnâk leh ṭangpinâk na ka pêk mi an muh tikah an ningzak lai.