Read Bawm Chin SAM 90 Bible Online

SAM 90 - Bawm Chin bible

SAM 90

¹LALPA, nang chu kan in na si kumza.

²Laikulh leh tlêng tla na siam lân khawmah nang chu zungzâl Pathian leh um kumza mi Pathian na si.

³Minung chu asi nâk ah si nawlh ding hen na simh. Valei ah kîr nawlh ding hen na siam.

⁴Na rangah kum sâng khat chu ni khat hâwi cho asi. Mazân a kal ving mi hâwi leh zân ah nari kar tâwi tak hâwi asi.

⁵Tâlian hâwi hen na kan put ving le; mang tluk khawm hen kan sâwt lo.

⁶Zînglei ah belh a thawk lup le, a par, zânlei chun a thi le, a châr hiam mi hâwi hen kan si.

⁷Na thinthawknâk nih hawng kan râwk dep le; na thinrunhnâk hen na kan lauh.

⁸Na mâika ah kan sual tla na siah le, a thup hen kan sual mi na muh khonâk ah chun.

⁹Kan san chu na thinthawknâk nih a tâwitir, thaw hâwi hen na dâitir.

¹⁰Kan san chu kum sâwmsarih asi le, chaknâk ruangah sâwmriat asi kho; khawmsele nawknâk leh ngaihsiatnâk cho asi; nungnâk hi tuko ah a dawng hen kan tlâu ving.

¹¹Na thinthawknâk thiltikho zia âu nih theih? Na thinrunhnâk nih zei ṭihnungkâi a hawng tlungtir kho mi âu nih theih?

¹²Kan san tâwi zia hi hawng kan sîntir le, chu tikah kan fing kho lai.

¹³Zeitiang riamruam me na thinthawknâk a sâwt awt? LALPA, na to-aw lakah hin khuaruatnâk nei rawh!

¹⁴Zînglei kipah na dâwtnâk dawng lo hen hawng kan khattir le, chu tikah kan nungnâk hi lâwm hen la a sak kho lai.

¹⁵Hamhnâk tuar hen kan dam liau kum zawzawng hi ngaihsiatnâk na kan pêk hâwi hen tuah lâwptlonâk hawng kan pêk.

¹⁶Na to-aw tla hi na chaknâk hen thil na ti mi tla hawng kan muhtir le; kan thlâk tla chu na thiltikhonâk rokual zia muhtir na.

¹⁷LALPA, kan Pathian, kan lakah na malsâwmnâk tlungtir le, kan thilti zawzawng ah dingchangnâk hawng kan pêk.