Read Bawm Chin SAM 91 Bible Online

SAM 91 - Bawm Chin bible

SAM 91

¹Him ding hen LALPA sinah kaltu leh zeizawng tikho Zauhkhenhnâk tangah umtu tla nih chun

²a sinah “Nang chu hawng ka vêngtu leh hawng ka kilkâwitu na si; ka Pathian na si, nangmah lakah ka ngauh,” a ti kho.

³Theihlo mi ṭihnungkâi zawzawng leh thihnâk râi zawzawng lakah mi him tak hen a nan kil lai.

⁴A thlâ hen a nan tuam lai le; amah vêngnâk ah chun him tak hen na um lai; zumh a kâinâk hen an vêng hen an zauhkhenh lai.

⁵Zân ah zei ṭihnungkâi tal khawm si seh, sân ah mawhsareh hen donâk a tlung khup khawmsele;

⁶mâi lakah râi hawng tlung khawmsele, sân ah sualnâk nih thah khawmsele, na ṭih ding asi lo.

⁷Na sârah an thi mi sâng khat tlâ na khawmsele, sâng râ na kiangkam ah tlû na khawmsele, nang lam chu nganfâk na tawng lai lo.

⁸Zei hâwi hen misual chu rêp an si, na zauh chun na muh lai.

⁹Nangmah vêngtu dingah LALPA chu na siam le, Chungnungchem chu nangmah kilkâwitu ah na siam le,

¹⁰churuang chun vânduainâk rerêng na lakah a tlung lai lo le, donâk rerêng na in kiangkam ah a hawng lai lo.

¹¹Pathian nih a vânmifial tla chu nangmah ruangrâl ah thu a pêk lai, na kalnâk zawngah a nan zauhkhenh ding hen thu a pêk lai.

¹²Lung nih na kê nganfâk a pêk ding mi lakah an vêng ding hen an kut hen an dawmh lai.

¹³Chakeibaknei tla leh rûl tla chu na chîl lai le, chakeibaknei rêng leh rûl tûrnei tla chu.

¹⁴Pathian nih chun, “Hawng ka dâwttu chu ka hum lai le, LALPA ka si ti hawng ka theihtu tla chu ka vêng na lai.

¹⁵An hawng ka auh tikah ka sâng na lai le; an lawksawng tikah an sinah ka um lai. Ruang ka suah na lai le, thangṭhatnâk ka pêk na lai.

¹⁶San sâunâk ka pêk na lai le, ka hum na lai,” a ti.