Read Bawm Chin THUFING LASUIBU 1 Bible Online

THUFING LASUIBU 1 - Bawm Chin bible

THUFING LASUIBU 1

¹Israel lalchem David fapa Solomon thufing.

²Hinah mi finghnâk thu hi, fing ding leh krai thiam ding leh thu kermê theihthiamnâk leikângah an ṭangpitu ding chu asi.

³Hi thu nih hin fing ding leh zumhkâi ding leh rep hen ṭha ding hen an sîntir kho.

⁴Mi krai thiamtir ding leh tlangvâl tla chu finghnâk neitu ah a siam kho.

⁵Hi thufing nih hin, mifing tla theihnâk leiah sap hen mi lasuithiam tla rangah ruinâk asi.

⁶Mifing tla nih thil an timhtuah mi leh thufing kermê â thup mi tla an theih kho.

⁷Theihnak nei ding hen LALPA chu na zah masachem ding asi. Simh ngâilo mi tla nih finghnâk khawm an siarlo le, sîn ding khawm an duh lo.

⁸Ka fapa, na nu leh na pa thusimh ngâi rawh.

⁹Na nunchan rangah puanmenh dawh tak hâwi mawh na ngâwng ah ṭhi awih nih na mêl an ṭhattir mi hâwi asi lai.

¹⁰Ka fapa, misual nih a nan lêm chun, a âwi lah.

¹¹Misual tla nih chun, “Hawng le, mi âumawh thah ding kan hâwl lai! Sualnâk neilotu tla rangah kan pangpi sawp na lai!

¹²Kan va tawng na tikah chun an nung hen dam na khawmsele, an sinah kan tlung tik chun an thi ngelchel lai!

¹³Neih-le-siah zât kip kan tawng lai le, chu kan tawng mi tla hen kan insung kan khah lai le!

¹⁴Hawng le, hawng kan bawp ko, kan fîr mi zeizawng kan ṭhenh vima lai,” an ti.

¹⁵Ka fapa, chubang hâwi minung tla sinah kal lah le, anmah thawk hen a dang hen um rawh.

¹⁶Thilsual ti an mawhlah, mi thah ding hen anna tîm kumza.

¹⁷Na tleih ding hen va a râlring liauah lên zâr chu a ṭha lo le,

¹⁸sikhawmsele, mi nih anmah awhtu dingah thang an tunh le, chu thang lakah anmah an thi lai.

¹⁹Rawkmang tla nih rawkmang thu karo an sim le, chu hâwi titu tla tlûnah chun siatnâk a hawng tlung tâwn.

²⁰Sumtuah mun ah leh zâwllâi ah finghnâk a âu mi chu ngâi le!

²¹Khuapi kulh kawtkâ ah leh zapi anna pumnâk ah a âu!

²²“Mi â tla! Zei chan riamruam me â hen nan um kumza awt? Theihnâk thu tla nihsanh nuam ti hen zei chan riamruam me nan um awt? Na sîn awt lo nget rih ma?

²³Nun ka nan simh liau hin ngâi. Krai ṭha tak ka nan pêk lai le, ka theihnâk ka nan ṭhenh lai.

²⁴Ka nan auh hen, hawng ding hen ka nan sâwm le; sikhawmsele na ngâi duh lo. Ka thusim khawm na ngâi duh lo.

²⁵Krai ka nan pêk mi chu zeikhawm na siarlo le, lungfiang an suahtu ding khawm na duh lo.

²⁶Churuangah na lawksawng ni ah ka nan nihsanh awt. Ṭihnungkâi na tawng ni ah kan tluktlak lai.

²⁷Thlipi hâwi hen na lakah a hawng tlung lai le, lawksawngnâk thli ṭihnungkâi tak a hawng put lai le, chu tikah, nang chu nganfâk tuar hen na lawksawng lai rawh.

²⁸Chu tikah finghnâk na auh lai le, sikhawmsele kei nih ka sâng ding asi lo. Mun kipah hawng ka hâwl khawm le, na ka tawng ding asi lo.

²⁹Finghnâk mang ding rerêng na nei lai lo, LALPA thu na ngâi ding na duh lo nget ruangah.

³⁰Ṭha tak hen ka nan siam awt mi, krai pêk khawm na duh lo, ka thu ngâi khawm na duh lo.

³¹Churuang chun, nangmah thilti na tlûnah a tlung lai le, nangmah thilti ngelchel nih a nan ngawrtir lai.

³²Mi krai thiamlo tla chu finghnâk an duh lo ruangah an thi. Theihnâk neilo mi tla chu an thinlung tum neilonâk nih a veih na.

³³Sikhawmsele, ka thu ngâitu chu a him lai. Ṭihnâk zeikhawm neilo hen a um lai,” ti hen.