Read Bawm Chin THUFING LASUIBU 10 Bible Online

THUFING LASUIBU 10 - Bawm Chin bible

THUFING LASUIBU 10

¹Hi bang tla hi Solomon thufing asi: Fapa fing chu a pa nih â zûm; fapa â lam nih chun a nu a lawksawngtir.

²Zumhmaih kâi hen neihnâk chu, zeikhawm an ṭhatvakpi lai lo. Sikhawmsele, zumhkâinâk nih na nungnâk a hum kho.

³LALPA nih mi ṭha chu sungvâng hen a siah lai lo, sikhawmsele misual tla thil duh lam chu a pêk lai lo.

⁴Na zângzêtnâk nih a nan pâmtir lai le, thanuam tak hen rianṭuannâk nih a nan neitir lai.

⁵Mifing nih a tikah a thil chîng chu a pumh le, fângzûn liau zawngah it chu vânduainâk asi.

⁶Mi ṭha nih malsâwmnâk â ting lai le, misual thusim nih umdân ṭha lo a pheh.

⁷Mi ṭha tla chu malsâwmnâk hâwi hen theihkumza an si lai, sikhawmsele misual lam chu philh sawm an si lai.

⁸Mifing tla nih chun krai ṭha pêk an duh. Â tak hen hawlhtu tla chu siatnâk ah an tlung lai.

⁹Mi zumhkâi tla chu him tak leh thlangam tak hen an um le, sikhawmsele mi zumhkâilo chu tleih an si lai.

¹⁰Thudik phehtu nih nawknâk a tlungtir le, sikhawmsele, lâilanh hen diklo zia langhtu nih thlangamnâk a siam.

¹¹Mi ṭha thu chu nungnâk tinung asi le, sikhawmsele misual nih umdân diklo a pheh.

¹²Huatnâk nih nawknâk a tuah le, sikhawmsele dâwtnâk nih palhnâk a huh phenh.

¹³Theihthiamnâk nei mi nih thufing an sim le, sikhawmsele mi â tla chu rêp an herh.

¹⁴Mifing nih theihthiamnâk anna ting. Sikhawmsele mi â tla thusim chu nawknâk tlunh a nâi tek.

¹⁵Neihnâk nih minei chu a hum. Pâmnâk nih mipâm a veih.

¹⁶Thil ṭha ti ruangah lâwmman chu nungnâk asi. Sikhawmsele, sualnâk nih sual khunnâk leiah a kalpi.

¹⁷Nunsimh hen an um mi ê-aw ngâitu tla chu an nung lai. Sikhawmsele anna pêk duhlotu tla chu diklonâk ṭihnungkâi ah an um.

¹⁸Huatnâk phehtu chu mi âwkrâwl asi. Âuzawng chawngawih mangtu chu mi â asi.

¹⁹Na thusim a tam bilik leh na sual dadauh hâwi asi. Mifing na si chun na dâisip lai.

²⁰Mi ṭha thu chu tangkasa hâwi asi, misual thinlung dawn chu mang tlâk asi lo.

²¹Mi ṭha thusim chu mi tamtak ṭhatnâk asi. Sikhawmsele na mâwlnâk ruangah na thah kho.

²²LALPA malsâwmnâk nih asi a nan neitir mi chu. Tha fâk tak rianṭuan nih an neitir khun lai loh.

²³Sual thilti nuam titu chu mi â asi. Theihthiamnâk nei mi tla chu finghnâk lakah anna lâwm.

²⁴Mirep nih an duh mi thil an tawng le, sikhawmsele misual tla nih an ṭih chem mi an tawng.

²⁵Thli a hawng râng le, misual tla a ranh phin na, sikhawmsele mi dik chu an him kumza.

²⁶Mi zângzê rerêng na rangah thilti ding hen duh lah le; theithur nih na hâ a zâtir hâwi mawh meikhû na mit ah â rawlh mi hâwi asi lai.

²⁷LALPA thu ngâi le, na san a sâu lai. Misual tla chu an thih cham phanh lânah an thi.

²⁸Mi ṭha lungumnâk nih lâwmnâk leiah a kalpi le, sikhawmsele, misual tla nih an mâilei thil zeikhawm silo mi an zauh.

²⁹LALPA nih mi zumhkâi tla a hum na le, sikhawmsele thilsual titu tla lam chu a veih na.

³⁰Mirep tla chu himnâk anna ting kumza lai. Sikhawmsele misual tla lam chu pakhat khawm ram lakah âk lo hen an thi lai.

³¹Mirep tla nih finghnâk thu an sim le, sikhawmsele, thusual simnâk kâ chu bângtir asi lai.

³²Mirep tla nih hawlh ding mi zât an theih le, sikhawmsele misual tla nih chun nganfâknâk thu karo an sim tâwn.