Read Bawm Chin THUFING LASUIBU 11 Bible Online

THUFING LASUIBU 11 - Bawm Chin bible

THUFING LASUIBU 11

¹Khîng diklo mangtu tla chu LALPA nih a hua. Khing dik tak chu LALPA nih a lawmh.

²A zûm mi minung chu ningzaknâk a tawng sawm lai. Mi thinlung nâu chu a fing dauh.

³Mi ṭha na si chun zumh na kâi. Mi zumhkâilo chu zumh an kâi lonâk nih a veih na.

⁴Na thih ni ah neihnâk chu zeikhawm asi lo. Sikhawmsele zumhkâinâk nih na nungnâk chu a hum kho.

⁵Zumhkâinâk nih mi ṭha nun a nuamtir le, sikhawmsele misual nih chun amah niamnâk thil a ti.

⁶Repnâk nih mi zumhkâi rangah mang a suah le, sikhawmsele mi zeimaw mi zumhmaihnâk neitu chu amah hamkahnâk thang nih a awh.

⁷Misual chu a thih ni ah a lungumnâk khawm a vei chawlh. Neihnâk lakah ngauh mi chu zeikhawm asi lo.

⁸Mirep chu nawknâk lakah a him le, a ruangrûl ah misual nih a tuar.

⁹Pathian neilo mi thusim nih a nan râwk kho. Sikhawmsele mirep finghnâk nih a nan hum kho.

¹⁰Mi zumhkâi tla vânṭhatnâk an tawng liauah khuapi lakah lâwmnâk a um. Misual tla thih ni ah lâwmnâk âu hâu a um.

¹¹Khuapi chu mirep tla nih mal an sâwm chun rokual tak hen a um le, sikhawmsele misual tla thu ruangah khuapi chu râwk hen a um.

¹²Midang tla siarlo tak hen thusim chu âtkâi tak asi. Na fing mi asi chun na dâisip lai.

¹³Mi ka tam chu thuthup lakah âukhawm zumh an kâi lo le, sikhawmsele mi zumhkâi lakah lam chun na rinhsan kho.

¹⁴Ruitu umlo chun phun chu a tlû lai. Krai pêktu tamtak nih himnâk an siam.

¹⁵Ramdang mi leisam ding hen thu na tiam chun na lawksawngnâk asi lai. A kawpkaih lo hen thliar le, a ṭha dauh.

¹⁶Nungâk vêlnei chu zah a kâi le, sikhawmsele nunau fâifîm lo chu zahpi a kâi. Mi zângzê nih zeiliau khawm tangka a nei dah lai loh. Mi ṭuanrât nih neihnâk â ting lai.

¹⁷Vêl na nei liauah ṭhat suahtu na si. Ṭhatlo na rawt chun nangmah nganfâk na pêk mi asi.

¹⁸Misual tla nih chun zeikhawm an lawh lo le, sikhawmsele thil dik na ti chun lâwmman na ting ngelchel lai.

¹⁹Âuzawng thil dik ti tumtu chu a nung lai le, sikhawmsele thilsual titu lam chu a thi lai.

²⁰Mi thinlung sual tla chu LALPA nih a hua na le, sikhawmsele thil dik titu tla lam chu a dâwt na.

²¹Misual rêp ding mi chu na theih chia asi. Sikhawmsele mirep tla chu ruang an suak lai.

²²Nunau mêlṭha finghnâk thinlung neilo mi chu, vawk nâr ah ngûn khâng thlaih mi hâwi asi.

²³Mi ṭha tla thil duhnâk lakah chun thil ṭha a hawng suak tâwn le, misual tla nih an duh mi an tawng ni ah mikip an thinrun.

²⁴Zeimaw mi tla nih siang tak hen an tangka an mang le, an nei dadauh. A zeimaw mi nih thiamthih hen an mang le, sikhawmsele an pâm dadauh.

²⁵Hawk le, na sul-le-lam a tluang lai. Midang ṭangpi na le, nang khawm a nan ṭangpi bâk lai.

²⁶A thupthli hen a man sâng dauh chawnh hen fâng khawngtu chu mi nih siat an barh lai. Sikhawmsele, a zuartu chu an sawr.

²⁷Na thiltum a ṭha chun zahkâi hen na um lai. Sikhawmsele nawknâk siam ding na tum chun chu lîlâ chu na tawng lai.

²⁸A neihnâk ngauhsantu chu busik pâr ah nah a tlawng mi hâwi hen a um lai le, sikhawmsele mirep lam chu ṭhâlpini thing nah a chawrh mi hâwi asi lai.

²⁹A dâwngsung nawktirtu nih a dawnghnâk ah zeikhawm a nei lai lo. Mi â chu mifing to-aw asi kumza lai.

³⁰Repnâk nih nungnâk a pêk le, sikhawmsele siatnâk nih a veih ving.

³¹Mi ṭha chu hi tual tlûn khawmah lâwmman pêk hen a um le, misual leh mi ṭhalo chu rêp hen an um ding na theih chia an si.